Madaxweynaha Soomaaliya iyo Wefdi uu hogaaminayo ayaa saakay u ambobaxay Dalka Suudaan

safar-madaxweyneMadaxweyne Xasan Shiikh Maxamuud iyo wefdi uu horkacayo ayaa saakay ka duulay garoonka aaden cadde iyagoo kusii jeeda Magaalada Khartuum ee dalka suudaan.

Wefdiga Madaxweynaha waxaa kamid ah wasiirka Arrimaha Gudaha iyo Amniga C/kariim Xuseen, Wasiirka Maaliyadda iyo Qorsheynta Maxamuud Xasan Suleymaan, W. Dowlaha arrimaha Dibadda, Wasiirka Howlaha Guud iyo Gaadiidka, Xildhibaanno, Agaasimaha Hay’adda Nabad Sugidda Qaranka Axmed Macallim Fiqi iyo Saraakiil kale , waxaana garoonka aaden cadde kasii sagootiyay Wefdiga R/wasaare Cabdi Faarax Shirdoon,Wasiirro iyo Saraakiil kale oo ka tirsan DF Somalia.

Madaxweynaha ayaa casuumaad rasmi ah ka helay Madaxweynaha suudaan Cumar Xasan Albashiir iyadoo labada madaxweyne ay ka wada hadli doonaan arrimo ku saabsan xoojinta xiriirka ka dhexeeya labada dal iyo sidii loo kordhin lahaa tababarrada ay Suudaan siiso Ciidamada dowladda islamarkaana ay usii dardar gelin lahaayeen Dedaallada lagu xasilinayo Somalia.

Sidoo kale Madaxweynaha ayaa ka qeybgali doona Munaasabad lagu furayo Shirkad shidaal oo lagu qabanayo Magaalo kale oo ka tirsan suudaan.

Sidoo kale waxa uu Madaxweynaha safarkiisa Sudan kadib uga sii gudbi doonaa Wadanka Burundi sida ay xaqiijiyeen saraakiil ka tirsan Aqalka Madaxtooyada Villa Somalia.

waa markii ugu horreysay uu Madaxweynaha Somalia safar ku aado Suudaan tan iyo markii uu ku guuleystay Xilka Madaxtinimo ee Somalia horaantii September ee sanadkii hore.

Horseed Media
Muqdisho-Somalia

Take The Conversation Further

We'd love to know your thoughts on this article. Meet Horseed over on Google+ or Twitter to join the conversation right now!