QM oo abaal-marin siisay saxafiyiin jooga Puntland oo ku guulaystay tartan dhacay sanadkii hore – Sawirro

IMG_5240Qaramada midoobey iyo ururka saxafiyiinta Soomaaliyeed ee NUSOJ ayaa abaal-marino gudoonsiiyey maanta 8 ka mid ah weriyaasha soomaalida oo ay afar ka mid ah joogaan Puntland, xaflada abaal-marinta ayaa ka dhacday Garoowe iyo Muqdisho.

Munaasabada abaal-marinta lagu bixinayey ayaa weriyaasha Puntland ee guulaystay waxaa loogu qabtay PDRC waxaa ka qayb galay saxafiyiinta gobolka jooga, madaxda ururrada MAP, NUSOJ, ururrada rayidka ee PUNSAA, wasaarada warfaafinta iyo saraakiil ka socday UNDP.

Advertisements

Gudoomiyaha ururka saxafiyiinta Soomaaliyeed ee NUSOJ Burhaan Axmed Daahir oo xaflada hadal dheer ka jeediyey ayaa u hanbalyeeyey weriyaasha guulaystay, sidoo kale wuxuu goobta ka akhiriyey khudbad loogu talo-galay bixinta abaal-marinta oo soo diray Philippe Lazzarani xiriiriyaha arrimaha bini’adanimo ee QM u qaabilsan Soomaaliya.

“Saxafiyiinta ha ku dadaaleen in ay gudbiyaan xaqiiqooyinka bini’adanimo iyo codka dadka dhibaataysan ee jooga deeganadiina.” Ayaa lagu yiri qoraalka Philippe Kazzarani ee loo qorsheeyey munaasabada.

Saxafiyiinta dhinaca Puntland guulaystay ayaa kala ah : -

Cabdiraxmaan Cabdi Maxamed – Horseed Media

Cabdiraxmaan Axmed Yuusuf – Radio Daljir

Cabdi Xasan rooble Awoowe – Radio Daljir

Maxamed Salaad Xaaji Dirir – Radio Daljir

Wasiirkii hore ee warfaafinta Puntland Axmed Sheikh Jaamac oo xiray munaasabada bixinta abaal-marinada kala duwan ee la siiyey weriyaasha, waxaa uu sheegay in ay tahay guul weyn talaabada ay qaadeen saxafiyiinta, waxaa uu ku dhiiri-geliyey in howsha sii wadaan.

Tartanka saxafiyiinta Soomaaliyeed oo dhacay dhamaadkii sanadkii hore, waxaa ka qayb galay in ka badan 100 weriye oo ku sugan Koonfurta, Puntland iyo Soomaaliland, waxaana guulaystay 12 ka mid ah oo kala jooga deeganadaas, tartanka waxaa lagu tilmaamay dhiiri-gelinta saxafiyiinta ee howsha ay qabteen.

Horseed Media

Garoowe

Comments

  1. Khadija Musse says

    Hambalyo suxufiyiinta abaal gudka helay , wanaaga in la isku abaal mariyo waa kalsooni galin Iyo mahad celin qofka hawsha soo qabtay Iyo dhiira galin dhaqaalaha kala oo ku jooga raadkooda oo suxufiyiinta ah .