Madaxweynaha Puntland ayaa waxaa safarkiisa ku wehliyey qaar kamid ah Wasiirada xukuumada Puntland oo ay kamid yihiin Wasiirka Amniga Gen.Yusuf Ahmed Khayr, Wasiirka Waxbarashada Cabdi Farax Juxa, Wasiirka Duurjoogta Cabdiqani Yusuf iyo xubno kale.

Amaanka

”Furaha Amaanka waa Bulshada iyo Shacabka Reer Bosaaso, waa in laga Shaqeeya oo gacan la siiya Ciidanka Amaanka si ay u sugaan Amniga”, ayuu ugu baaqay Shacabka ku dhaqan magaalada Bosaaso.

Wuxuuna sheegay in Ciidanka ay maalmahaan dadaal ugu jiraan wax ka qabashada falalka amaan darada ka jiray Bosaaso.

Sidoo kale wuxuu sheegay in ay Maamulkiisa ka shaqayn doonaan oo ay wax ka qaban doonaan arimaha Amaanka, ugana baaqay Shacabka in ay gacan ka geystaan dadaalkaasi ay xukuumadu wado.

Madaxweynaha Puntland Dr.Faroole oo lagu soo dhaweeyey magaalada Bosaso ayaa shir jaraa’iid ku qabtay Madaxtooyada Bosaso kaga hadlay arrimaha Amniga iyo Burcad badeeda.

Warbixintii Burcad Badeeda

Madaxweyne Faroole ayaa shirkiisa Jaraa’iid eed weyn dusha uga tuuray hay’ada International Monitoring Group, ee Qaramada Midoobay oo dhawaan warbixin ku aadan burcad badeeda kasoo saartay deegaanada Puntland

Madaxweynaha Puntland ayaa sheegay in war been ah oo aan sal iyo raadlaheyn ka tabiyeen dhulka Puntland, hay’adaasi iyo shaqsiyaad la xariira, asagoo sheegay in Puntland ay tahay mid la dagaalantay Burcad badeeda isla markaana xabsiga dhigtay burcad badeed gaareysa 264.

Wuxuu sheegay Madaxweynaha Puntland oo si qoto dheer uga hadlay arrimaha burcad badeeda iyo warbixintii dhawaan loo gudbiyey Qaramada Midoobay ayaa sheegay in Puntland baaritaan ku sameyn doonto dadkii falalkaasi been abuurka ah ka sameeyey deegaanada Puntland, wuxuuna Madaxweynaha Puntland ugu baaqay beesha Caalamka in dadka falalkaasi been abuurka ah tabiyey ay wax ka qabtaan.

Madaxweyne Faroole ayaa ku tilmaamay xubno salka ku haya siyaasad inay warbixintan ka qeyb qaateen oo wararkan faafiyeen, asagoona sheegay in warbixintan lasoo saaray ayadoo aan Puntland la imaan oo wax baaritaan ah la sameyn.

Wuxuu Madaxweyne Faroole ku nuux nuuxsaday in ay la yaab tahay in warbixintan lagu tilmaamo in Somaliland iyo Dowlada Fedraalka laga caawiyo arrimaha Burcad badeeda, halka Puntland la eedeeyey, asagoo sheegay in labadaas maamul aysan wax weyn ka qaban karin burcad badeeda, marka laga reebo dad kooban oo ay Somaliland sheegtay inay xir xirtay, halka Dowlada Federaalka aysan waxna gacanta ku hayn.

Dr.Faroole ayaa sidoo kale sheegay in warbixintan ay ku tuhunsan yihiin inuu lug weyn ku leeyahay Wasiirka Kaluumeysiga ee Dowlada Federaalka Soomaaliya, oo hada kahor warar noocaan ah ka gudbiyey Puntland iyo xubno uu ku tilmaamay inay ku shaqeystaan hay’ado kala gedisan.

Madaxweynaha Puntland ayaa shalay safar ugasoo ambabaxay magaalada caasimada ah ee Garowe, asagoo magaalada Qardho kusoo hakaday xalayna ku hoyday, halkaasi oo la sheegay in kulamo uu kula yeeshay odayaasha iyo waliba xubno kamid ah Dowlada Puntland oo halkaasi ku sugayey, asagoona maanta usoo gudbay magaalada Bosaso.

Horseed Media

Madaxweynaha dalka Jabuuti Ismaacil Cumar Geele oo la hadlaayay Wakaalada wararka ee Reuters ayaa sheegay in aysan Xukuumadiisa u qorshaysnayn in Ciidan nabad ilaalineed usoo dirto dalka Soomaaliya.

Wuxuuna sheegay in ay jirtay guux Siyaasadeed oo tilmaamayay in bilooyinka soo socda ay magaalada Muqdisho gaari doonaan dalka Jabuuti si ay uga qayb qaatan howlaha nabad ilaalineed ay wadaan Ciidanka nabad ilaalinta ee AMISOM.

Madaxweynaha ayaa isagu faahfaahin dheeraad ah ka bixinin sababaha ka dambeysay in uu kasoo horjeesto soo dirista Ciidan nabad ilaalineed xilli Madaxda Ururka Midowga Afrika ay shaaciyeen in Dowladda Jabuuti u diyaar garowday in ay Ciidan usoo dirto Soomaaliya.

Wasiirka arimaha dibada ee Jabuuti Maxamuud Cali Yuusuf ayaa isagu bishi aan soo dhaafnay sheegay in dhowaan magaalada Muqdisho ay gaari doonaan Ciidan nabad ilaalineed,waxaana hadalka kasoo yeeray Madaxweyne Ismaacil Cumar Geele khilaafaya hadalka Wasiirkiisa.

Waxaana ay Dowlada Jabuuti la sheegay in ay qorsheysay in Ciidan gaaraya 450-Askari soo dirto oo gacan siiya kuwa AMISOM ee ka kala socda wadamada Uganda iyo Burundi.

Horseed Media

Codbixintan ayaa ahayd mid xasaasi ah isla markaana ku khasabtay Madaxweynaha Maraykanka Obama inuu olole dheer u galo in uu cod ku filan ka helo golaha Wakiilada ee dalkaasi Maraykanka.

Codbixintii xalay la qaaday ayey Xildhibaanada Maraykanka 219 u codeeyeen in la ansixiyo qorshahan, halka ay kasoo horjeesteen 212, ayadoo 7 cod oo kaliya ku guuleysteen taageerayaasha qorshahan caafimaadka.

Xisbiga Jamhuuriga ayaa asagu si weyn uga soo horjeeday qorshahan ayadoo dhamaan Xildhibaanada xisbiga Jamhuuriga ay si wadajir ah ugu codeeyeen in qorshahan aan la ansixin, waxaa sidoo kale jiray xubno kooban oo kamid ah xisbiga Dimuquraadiga oo ayaguna aan u codeyn qorshahan.

Codbixintan ayaa noqoneysa guushii ugu weyneyd ee siyaasadeed ee uu helo Madaxweyne Barack Obama intuu xilka hayey, wuxuuna u ololeenayey qorshahan tan iyo intii uu xilka qabtay sanadkii lasoo dhaafay ee 2009.

Qorshaha Caafimaadka ee uu Barack Obama doonayo in wax looga bedalo ayaa ah in caymis caafimaad ay helaan dhamaan Shacabka Maraykanka, ayadoo loo sahlayo dadka saboolka ah inay iska bixin karaan dhaqaalaha caymiska, arrintan oo ay si weyn uga soo horjeedaan dadka ku eedaynaya Xukuumada Obama inay dooneyso inay sare u qaado Canshuurta si ay u kabto caymiska caafimaadka ee lasiinayo dadka saboolka ah.

Obama ayaan si aan horey looga baran dowladihii hore ee Maraykanka olole dheer u galay inuu ka dhaadhiciyo xildhibaanada iyo waliba shacabka Maraykanka inay taageeraan qorshihiisa, asagoo sheegay in lama huraan ay tahay in malaayiinta Maraykanka ah ee aan heysan wax caymis caafimaad ah ay helaan adeega caafimaad ee dadka ee dhaqaalaha heysta ay helaan.

Qorshahan ayaa ah mid tijaabo u ah taageerada uu Obama heysto, waxaana codbixintii xalay si weyn usoo dhaweeyey Xisbiga Dimuquraadiga ee Barack Obama oo ayagu heysta inta badan kuraasta Golaha wakiilada ee dalkaasi Maraykanka.

Horseed Media

Ali Khumeyni ayaa sheegay in dowlada Maraykanka hadaladeeda iyo siyaasadeeda ay fuliso aysan ahayn kuwo isleh isla markaana ku eedeeyey in dowlada Maraykanka ay tahay mida fidmada dhex dhigta caalamka.

Wuxuu sheegay hogaamiyaha Iran in dowlada Maraykanka ay had iyo goor ka hadasho inay xaq dhowrto Xaquuqul Insaanka, balse wuxuu sheegay in Maraykanka uu kamid yahay wadamada ku tunta xaquuqul Insaanka.

Ali Khumeyni ayaa ku sheegay hadalkii dhawaan uu jeediyey Madaxweynaha Maraykanka Obama, dhanbaalkiisii uu u diray Iran, xuska sanadka cusub ee dalkaasi Iran ayuu Khumeyni ku sheegay hadal aan waxna laga soo qaadeyn.

Obama ayaa dhanbaal uu u diray dalka Iran todobaadkii tagay ugu sheegay shacabka Iran, in dowlada Maraykanka ay dooneyso inay hagaajiso xiriirka u dhaxeeya labada dal.

Hase yeeshee Khumeyni ayaa baaqan ku sheegay mid lagu doonayo in dadka lagu jahwareeriyo, asagoo sheegay in siyaasada Maraykanka ee ku aadan Iran ay tahay mid lagu doonayo in lagu majo xaabiyo Awooda dowlada Iran.

Horseed Media

Qoraal ay Xukuumada Israel u gudbisay dowlada Maraykanka ayaa lagu sheegay in Xukuumada Israel ay sii wadi doonto qorshaha ay ku dooneyso inay guryo gaaraya 1600 (kun iyo lixboqol) guri oo laga dhisayo dhulka laga baro kicinayo dadka Falastiiniyiinta ah bariga magaalada Qudus.

Qorshahan ayaa waxa horey si weyn uga soo horjeestay Maamulka Falastiin oo diiday in uu wax wadahadal ah la galo dowlada Israel, halka Qaramada Midoobay iyo wadamada reer Galbeedka oo uu kamid yahay Maraykanka ay ugu baaqeen in ay ka joogsato Israel qorshaha ay ku dhiseyso guryahan dhulka Falastiin.

Qoraalkan ayaa soo baxay todobaadkan oo uu booqasho ku tagayo dalka Maraykanka Raysalwasaaraha Israel Benjamin Netenyahu oo lagu wado inuu halkaasi kula kulmo mas’uuliyiinta Dowlada Maraykanka oo uu kala hadli doono qorshaha Israel iyo waliba xiriirka u dhaxeeya labada dal.

Horseed Media

Kulankan ayaa wuxuu dhexmarayaa kooxda loo yaqaan Xisbul Al Islami, iyo Xukuumada Xamiid Karsaay, waana kulankii ugu horeeyey oo fool ka fool ah oo ay Dowlada Afghanistan la gasho kooxaha kasoo horjeeda.

Xisbul Al Islami oo kamid ah kooxaha hubeysan oo horey isbaheysi la lahaa Dhaq dhaqaaqa Taliban, ayaa dhawaan xiisad soo kala dhexgashay xulafadoodii Talibanka, ayadoo ay jireen iska horimaadyo hubeysan oo bilihii lasoo dhaafay dhexmaray Xisbul Al Islami iyo Talibanka.

Wadahadalada ka bilowday Kabul ayaa lagu wadaa in Dowlada iyo Xisbul Al Islami ay uga wada hadlaan, sidii ay ku midoobi lahaayeen, walow ay jiraan qodobo keeni kara inuu shirkaasi natiijo la’aan ku dhamaado.

Kooxda Xisbul Al Islami ayaa qodobada ugu muhiimsan oo ay codsaneyso kamid yihiin, in ciidamada shisheeye ee ku sugan dalkaasi Afghanistaan ay ka baxaan wadankooda.

Horseed Media

Hadaba Maamulka iyo dhamaanba Muslimiinta ku tuka ee jecel udhawaan shaha Alle weyne (Dhambi Dhaafaha Awooda badan), waxa ay muujiyeen bahida weyn ee loo qabo in masaajidka la balaariyo, markaasna dhaqaalaha ku baxaya loogu baaqo Islaamka oo dhan, gaar ahaana Umada Soomaaliyeed.

Qeymeyn dheer oo lugu sameeyey kharashaadka ku baxaya Masaajidka ayaa lugu go’aaday in ay ku baxayso Lacag dhan (Hadii Alle Idmo), $150,000, taas oo laga doonayo in ay bixiyaan Shacabka Soomaaliyeed.

Masaajidka oo ah meel aysan cidna gaar ulaheyn waa guriga Alle, waxaana guriga Alle weyne oo aad ku bixiso, lacag ama aad wax ku darsataa ay tahay, adigoo guri ka dhistay Aakhiro, waxaadna heli doontaa maalin aad baahi weyn uqabto gargaarka Alle weyne Cazza Wajala.

Hadaba Walaal ka qeyb qaado dhismaha Masaajidka Salaaxu-Diin ee magaalada Gaalkacyo, waxaadna ugu soo hagaagi kartaa dadka kala ah.

Maamulaha : Masaajidka Salaaxu-Diin Sheekh Ismaaciil Khaliif Mirre

Tell: 00252-90-771427
Gudiga Masjidka : Burhaan Mohamoud Gurey
Tell:00252-90-795363
Gudiga Masjidka: Ibraahim Mohamed Osman (Ibrahim Abow) Tell:00252-90-708300
Gudiga Masjidka: Bilaal Caad Godo Godo
Tell: 00252-90-749052
Gudiga Masjidka: Burhaan Daahir Muuse
Tell: 00252-90-757171
Gudiga Masjidka: Ahmed Nuur Ali (Jaabir )
Tell: 00252-90-751512

Kooxda FC Horseed ayaa ku guuleysatay koobka sanadnalaha ah ee lagu qabto dalka Holland, koobkan ay soo qaban qaabisay Hay’ada Jaaliyadda Soomaalida ee magaceeda la yiraaho Nederland – Somalia (Nedsom) ayaa waxaa ka qeyb qaatay kooxo kala gedisan oo ka kala socday magaalooyinka dalka Holland qaarkood.

Koobka kubada cagta ayaa ah mid xiligan lagu qabto Hool dusha ka xiran oo ku yaal magaalada The Hague (Den Haag) xarunta dowlada Holland, waxaana kasoo qeyb galay in badan oo kamid ah Jaaliyadda Soomaalida oo halkaasi usoo daawasho tagay.

Tartankan ayaa waxaa ka qeyb qaatay wareegii shalay dhacay lix kooxood oo kala ahaa:

Amsterdam
Nedsom
Horseed
Zoetemeer
Alphen aan de rijn
Den Haag

Waxaana ciyaarta wareegii ugu danbeeyey isu soo baxay kooxda ka socotay caasimada Holland ee Amsterdam iyo kooxda Horseed, oo markii ugu horeysay usoo gudubtay Finalka.

Halkan ka daawo sawirada oo badan

Ciyaarta oo barbar ay labada kooxood isla dhaafi waayeen ayaa markii danbe labada kooxoo loo tuuray 5 rigoore midkiiba, ayadoo kooxda Horseed ku badisay rigoorayaashii, isla markaana ku qaaday koobka, Amsterdam ayaa kaalinta labaad gashay, halka kaalinta Sadexaad ay qaaday kooxda Alphen aan den rijn.

Video ciyaarihii

Abdishakur Cali
Horseed Media

Saraakil ka tirsan Madaxtooyada Villa Soomaaliya ayaa warbaahinta Horseed Media u xaqiijiyey in maalmaha ama asbuucyada soo socda uu Madaxweynuhu ka ambabixi doono magaalada Muqdisho oo iminka ku suganyahay.

Waxaana ay sheegeen in Safarka Madaxweynaha ay ku wehelin doonaan masuuliyin ka tirsan Dowladiisa,waxaana ay ka duuli doonaan garoonka diyaaradaha ee Aadan Cadde International Airport.

Saraakiishaas oo diiday in magacyadooda lasoo xigto ayaa xusay in laga yaabo Madaxweynaha uu ka qaybagalo Shirka Wasiirada arimaha dibada ee Wadamada Ururka Jaamacada Carabta oo ay kaga hadli doonaan arimo ay ku jirto xaalka dalka Soomaaliya.

Sidoo kale waxaa ay xuseen in Hogaamiyaha dalka Libya Koornayl Mucammar Al-Qadaafi ay macquul tahay in ay kulamo wada qaatan ayna kawada hadlaan arimo khuseeya labadda dal ee Soomaaliya iyo Libya.

Madaxweyne Sheikh Shariif ayaa dhowaan socdaal mudo ku dhow asbuuc kaga soo laabtay dalka Ingiriiska halkaas oo u kulan kula soo qaatay Dowladda Britain iyo Jaaliyadda Soomaaliyeed ee Ingiriiska.

Waxaana ay dhowaan ahayd marki Ra’isulwasaare Cumar C/rashid uu socdaal ku gaaray dalkaasi Liibya kula soo kulmayna hogaamiyaha dalkaasi iyo masuuliyin kale.

Madaxda Dowladda Fedraalka ayaa inta badan lagu eedeya in ay xooga saaran oo ay ku mashquulaan Safarada dalka dibadiisa aysan waxqabad ka samayn dalka gudihiisa,waxaana ay iyaguna sheegaan in Safaradaas ay yihin kuwa qayb ka ah howlahooda shaqo.

Horseed Media

Magaalada Sirta ee dalka Libya ayaa waxaa ku qulqulaaya Wasiiro iyo diblomaasiyin Carbeed kuwaas oo halkaasi dhamaadka Bishan uga furmi doono Shir ay ka wada yeelan doonaan xaaladaha wadamada colaadaha ka taagan oo xubin ka ah Ururka Jaamacada Carabta.

Masuuliyin ka tirsan Ururka Jaamacada Carabta ayaa Warbaahinta Carbeed u sheegay in kulankaasi diirada lagu saari doono xaalada iminka ka taagan dalka Soomaaliya iyo dagaalada weli kasi socda.

Kulanka ayaa ahaan doona mid ay Wasiirada kasoo jeedin doona qaabka ay uga xunyihin xaaladaha khalafsan ee ka jirta dalka,iyagoo ku baaqi doona Beesha Caalamka in ay gacan ka geysan doonaan soo celinta nabada iyo kala dambeynta ka jirtay dalka.

Dowladda Fedraalka ee Soomaaliya ayaa waxaa kulankaasi uga qaybgalaaya Wasiirka arimaha dibadda Cali Axmed Jaamac Jangeli oo isna halkaas khudbad uu kaga hadlaayo xaalka dalka Soomaaliya ka jeedin doona.

Ururka Jaamacada Carabta ayaa dhowr jeer oo hore ka hadlay xaalada xaalada dalka Soomaaliya.

Horseed Media

Wefdi u hogaaminaayo Madaxweynaha ayaa subaxnimadi maanta kasoo ambabaxay magaalada Garoowe ee caasimada Puntland,waxaana si weyn loogu soo dhoweeyey magaalada Qardho.

Masuuliyinta gobolka,degmada,Waxgarad iyo dadweynaha magaalada ayaa ka qayb qaatay soo dhowaynta,waxaana si aad ah loo sugaayay amniga guud ee magaalada.

Safarka Madaxweynaha ayaa ah mid aan hore loo si shaacin,waxaana aan la aqoon ujeedka socdaalkiisa magaalada Qardho.

Wararka qaar ayaa sheegaaya in Madaxweynaha u dhowaan sidoo kale soo gaari doono magaalada Bosaaso ee xarunta gobolka Bari.

Masuuliyinta gobolka Karkaar iyo kan degmada Qardho ayaa iyagu ka gaabsaday in ay faahfaahin ka bixiyaan safarka Madaxweynaha.

Horseed Media

Mid ka mid ah dadka degaanka ayaa Horseed Media u sheegay in Markab dagaal oo uu ka babanaayo calanka dalka Maraykanka uu ragaasi keenay meel ku dhow halka lagu magacaabo xeebta gacan,waxaana marki dambe ragaasi Burcad Badeeda ay marki dambe soo aadeen degmada Laasqoray.

Qofkaasi oo diiday in magaciisa lasoo xigto oo la sheego ayaa sheegay in dhacdadaan ay dhacday shalay gelinka dambe,uuna markabka dagaal iminka dib uga shiraacday xeebaha degmada Laasqoray.

Wuxuuna sidoo kale sheegay in tirada ragaasi uu markabka dagaal soo daadiyey ay gaarayaan 8-qof,ayna iminka ku suganyihin nawaaxiga Laasqoray iyadoo la sheegay in ay halkaas kasoo jeedaan.

Ila iyo hada ma cadda sida ay Ciidanka Badda ee Maraykanka qaabka ay ragaasi gacanta kusoo dhigeen,iyadoo aan weli wax war ah kasoo bixin Taliska Ciidanka oo ku aadan arintaan.

Horseed Media

Xaflad qalab lagu wareejinaaya Ciidanka dab damiska ayaa ka dhacday xarunta Dowladda Hoose halkaasi oo ay kasoo qaybgaleen maamulka gobolka Bari iyo kan degmada Bosaaso,Wasiir Kuxigeenka dekaddaha Puntland iyo masuuliyin ka socotay Hay’adda DRC iyo weliba dadweyne ayaguna daawanaayay qaabki ay u dhacaysay gudoosiinta.

Ciidanka dab damiska ayaa halkaasi kusoo bandhigeen gaardi iyagoona salaan ka qaadanaayay Gudoomiyaha gobolka Bari Sheikh C/xaafid Cali Yuusuf iyo Duqa degmada Bosaaso Maxamuud Faarax Beeldaaje,waxaana xarunta Dowladda Hoose maanta ay ahayd mid ay socod ku maraayeen Ciidanka dab damiska.

Madaxa Hay’adda DRC Mr Simon oo halkaas hadalo kasoo jeediyey ayaa u mahadceliyey dadki kasoo qaybgalay munaasabadi,waxaana u sheegay in qalabkaan uu yahay mid ay ugu talagaleen in ay ku caawiyaan Ciidanka dab damiska ee Bosaaso,isagoo tibaaxay in maamulki hore ee degmada ay ka dhaxeysay wada shaqayn ayna sidoo kale maamulka cusub la shaqayn doonaan.

Duqa degmada Bosaaso Maxamuud Faarax Beeldaaje ayaa mahadcelin usoo jeediyey Maamulka Hay’adda DRC oo u ku tilmaamay in ay wax badan ka caawiyaan Ciidanka dab damiska oo haya hawl aad u baaxad weyn,waxaana u ugu baaqay Ciidanka dab damiska in ay ilaashadaan agabkaan maanta loogu deeqay.

Gudoomiyaha gobolka Bari Sheikh C/xaafid Cali Yuusuf oo halkaasi hadalo kasoo jeediyey ayaa sheegay in ay aad ugu faraxsanyihin qalabkaan ay ugu deeqday Hay’adda DRC Ciidanka dab damiska,waxaana uu ka codsaday Hay’adda in ay wadaan howlaha ay qabanayaan isla markaana sidoo kale bilaaban tababaro ay u fidinayaan Ciidanka dab damiska.

Waxaana uu ugu baaqay dadweynaha ku nool magaalada Bosaaso in ay ka qayb qaatan hagaajinta iyo furitaanka wadooyinka dhexmara magaalada.

Ciidanka dab damiska ee degmada Bosaaso ayaa inta badan damiya dabka ka kaca xaafadaha iyo goobaha kala duwan ee magaalada.

C/salaan Axmed Shire

Horseed Media

Bosaaso,Soomaaliya

Xiisadahaas Colaadeed ayaa yimi ka dib marki dhowaan Rag hubeysan ay  Saddex qof oo rayid ah dil toogasho ugu geysteen degmada ayna ku guuleysteen in ay baxsadaan.

Qof ka mid ah dadka degaanka oo la hadlaayay Horseed Media ayaa sheegay in jawi deganaansho laga dareemaayo halkaasi,iyadoo dadweynaha halkaas ku dhaqan ay maalmahaan ka cabsi qabeen in halkaasi ay ka dhacaan falal amaan daro.

Waxaana u hadalkiisa ku daray in maamulka degmada iyo Waxgaradka halkaas ku dhaqan ay dadaal u galeen sidii loo qaboojin lahaa xiisada halkaas ka dhalatay oo ay ka dambeysay dilalki halkaas ka dhacay.

Maamulka degmada Xingalool ayaa iyaguna sheegay in ay dadaal u galeen isla markaana la wada hadal la galeen Beesha dadka laga dilay kuna qanciyey in ay soo qaban doonaan Raggi dilalkaasi geystay.

Maalmo ka hor maamulka gobolka Sanaag ayaa shaaciyey in ay ku daba joogaan Kooxihi hubeysnaa ee dilalkaasi geystay,waxaana loo malaynaaya in ay u baxsadeen gobolka Sool.

Horseed Media

War Saxaafadeed ay soo saareen nuqul ka mid ah ay soo gaarsiiyeen Warbaahinta Horseed Media ayay ku sheegeen in ragaasi ay qab qabteen maalmihi lasoo dhaafay ka dib marki ay howlgalo ka sameyeen Xeebaha gacanka Cadmeed.

Sida ku cad War Saxaafadeedka Markab dagaal FGS EMDEN iyo diyaarad Helicopter ah ayaa ragaan ka qab qabtay meel ka baxsan xeebaha Soomaaliya xilli ay doonayeen in ay afduubtaan dooni nooca kallumaysiga oo lagu magacaabo ALBATUN 2 kaasi oo laga leeyahay dalka Spain.

Inta aan lasoo qaban ragaasi ayaa waxaa ay isku deyeen in ay baxsadaan iyagoo isku tuuray Badda,waxaana ay wateen sida ay sheegeen Saraakiisha Midowga Yurub labo doomood oo yar yarka iyo Maraakiibta waa weyn oo ay Burcad Badeeda adeegsadaan xilliyada ay weerarada qaadayaan.

Ragaasi ayaa iminka Su’aalo lagu weydinaaya markabka dagaal ee soo qabtay,waxaana laga baaraya fal dambiyeedka ah in ay yihin Burcad Badeed iyo in kale.

Ciidanka Midowga Yurub ee ku sugan xeebaha Soomaaliya ayaa hore u qab qabtay Burcad Badeed,iyagoo sidoo kale burburiyey gaadiid ay wateen oo ay iska lahaayeen.

Horseed Media