golis

Cadaado: Xildhibanaadii Waan-Waanta Ka wadey Galmudug oo Caqabad Xooggan La Kulmey -WAR MURTIYEED

Xildhibaano gaaraya sagaal xubnood oo ka soo jeeda deegaanada Galmudug isla markaana ka kooban labada aqal ayaa ku guuldaraystey in ay xaliyaan xiisaddii siyaasadeed ee ka aloosneyd Cadaado, waxaana ay eedeyn dusha uga tuureen Dowladda federaalka ah oo ay sheegeen in ay si toos ah u maalgelisey qalaalsaha ka taagan cadaado, sidoo kale waxay sheegeen in ay soo joog ka waayeen Madaxweyne ku-xigeenka iyo guddoomiyaha baarlamaanka Galmudug. Waxay sidoo kale sheegeen inay Madaxtooyada Soomaaliya Magaalada Cadaado usoo dirtay Musharax lagu doonayo in lagu qalqal geliyo xasiloonida Maamulkaas.

Magaalada cadaado ayaa la ciir-ciireysa ciidankii ugu badnaa ee abid halkaas yimaada waxaana wararku sheegayaan in ciidamo beeleedyo magaalada laga soo buuxiyey.

Hoos ka akhri war murtiyeedkii ay soo saareen

WAR MURTIYEED

  1. Wafdi ka kooban Xildhibaanada labada Gole ee Baarlamaanka Federaalka Soomaaliya, kuwaasoo deegaan doorashadoodu tahay Dowlad Goboleedka Galmudug, waxey booqasho howleed ku yimaadeen caasimada ku meelgaarka ah ee Cadaado 27 September 2017, safarkaas oo ujeedadiisu ahayd xal u helida ismaandhaafka soo kala dhex galay hoggaanka sare Galmudug.
  2. Wafdiga Xildhibaanadu waxey kulamo gaar gaar ah la qaateen Madaxweynaha Galmudug, Madaxweyne ku-xigeenka, Gudoomiyaha Barlamaanka iyo labada ku-xigeen.
  3. Sidoo kale Xildhibaanadu waxey kulamo gaar ah la yeesheen odoyaasha dhaqanka Galmudug iyo qeybaha kale ee bulshada, kuwaasoo dareen iyo walaac ka muujiyey isqabqabsiga siyaasadeed ee hogaanka sare Galmudug ka soo ifbaxday, ayagoo ku taliyey in maamulka la heshiisiiyo, muujiyena in aysan aqbali karin qalalaase siyaasadeed oo dibadda laga soo abaabulay.
  4. Kadib wada hadalo dheer oo aan la yeelay dhinacyada khilaafku u dhaxeeyo waxaan ku guuleysanay marka hore in aan isoo horfariisano hogaanka u sareeya Galmudug, iyaga oo iskaga garaabay tabashooyinkii shaqsiyadeed ee ka dhaxeeyay mudadii ay wada shaqeynayeen.
  5. Intaas kadib, waxaan dadaal dheer ku bixinay sidii xal kama danbeys ah loogu heli lahaa is afgarawaaga ka dhashay kala aragti duwanaansho madadxa Galmudug ee dhanka maamulka iyo siyaasadda.
  6. Waxaan ka codsanay labada dhinac in ay noo talo dhiibtaan, si aan xal uga wada gaarno khilaafkooda siyaasadeed iyo midka maamulba. Nasiib wanaag Madaxweyne Ahmed Ducaale Geele waa innaga ogolaaday inuu u hugaansamo talo soo jeedinta Xildhibaanada iyo wixii go’aamo ah oo ay xal u arkaan intaba. Waxaa ayaan daro noqotay in dhanka kale oo kale ah Madaxweyne ku-xigeenka, Gudoomiyaha Barlamaanka iyo ku-xigeenka labaad ay diideen in ay ogolaadaan furidda wada xaajoodka, iyaga oo ku adkeystay in ay xal u arkaan in Madaxweyne Ahmed Ducaale Geele u hugaansamo go’aankii Barlamaanka
  7. Wafdiga Xildhibaanada waxa uu dul istaagay, xaqiijiyayna in mas’uuliyiin sarsare oo katirsan Madaxtooyada Soomaaliya iyo dad u adeegaya si qaawan faragelin ugu sameeyeen duminta maamulka Galmudug. Iyaga oo soo abaabulay murashax madaxweyne oo lagu maalgeliyay hantidii qaranka, isla markaana ciidamadii qaranku ilaalinayaan, taasoo wiiqeysa kalsnoonida iyo wada
    shaqeynta Dowlada Federaalka iyo Dowlad Goboleedka Galmudug.
  8. Waxaan xaqiijinay in maleeshiyo beeleedyo iyo hub farabadan oo ay wataan kana amar qaadan maamulka Galmudug ay hada si muuqaal xoogan leh ugu suganyihiin magaalada Cadaado taasoo sababi karta qalqal amni.
  9. Waxaa inoo soo baxday markaan aragnay xaaladaha amni, bini’aadamnimo ee deegaanka ka jirta iyo xaalada siyaasadeed ee sii kala fogaaneysa maamulka Galmudug, waxaan soo jeedinaynaa talooyinka soo socda:
  • I. Waxaan ugu baaqeynaa shacabka reer Galmudug sida Odoyaasha Dhaqanka, Culumodiinka, Ganacsatada, Haweenka, Dhalinyarada iyo qaybaha kale ee bulshada in ay u istaagaan ilaalinta amniga iyo xasiloonida deegaanada Galmudug.
  • II. Sidoo kale mas’uuliyiinta Galmudug waxaan usoo jeedinaynaa inay u guntadaan in ay khilaafaadkooda ku xalistaan wada hadal, degenaan iyo is-afgarad.
  • III. Waxaan uga digeynaa Madaxtooyada Soomaaliya faragelinta ay ku hayso Dowlad Goboleedka Galmudug. Taas oo horseedi karta burbur iyo xasilooni daro ku timaada Maamulka iyo deegaaada Galmudug.
  • IV. Waxaan uga digeynaa Xukuumada Soomaaliya in faragelin ay ku sameyso maamulka Galmudug, isla markaana ay soo saaraan waraaqo aan ka turjumayn xaqiiqada jirta.
  • V. Guud ahaan shacabka Soomaaliyeed iyo gaar ahaan Dowlad Goboleedyada Soomaaliya waxaan ka codsanaynaa in ay dadaal ku bixiyaan isu soo dhaweynta iyo xalinta khilaafka u dhaxeeya madaxda Galmudug. Sidoo kale in ay hor istaagaan isu day kasta oo lagu cuuryaaminayo nidaamka ku dhisan federaalka ee ka hana qaaday Soomaaliya.
  • VI. Beesha caalamka waxaan ugu baaqeynaa inay gargaar deg deg ah lasoo gaarto dadka abaartu halakeysay ee deegaanada Galmudug.

Wabillaahi Tawfiiq