golis

Muuse Biixi oo Daah-furay Qorshaha Shanta Sanno ee Hay’adda Dhawrista Tayada Somalilan

Madaxweynaha Somaliland Muuse Biixi Cabdi, ayaa magaalada Hargaysa si rasmi ah uga daah-furay qorshaha shanta ee soo socota ay ku hawlgeli doonto hay’adda dhawrista tayada Somaliland.

Munaasibadda daah-furka qorshaha shanta sano ee hay’adda dhawrista oo lagu qabtay Hutel Maansoor ee magaalada Hargeysa maanta, ayaa waxa ka qaybgalay madaxweyne Muuse Biixi Cabdi, madaxda hay’adda dhawrista, xubno kamid ah golaha wasiirrada, xildhibaanno, siyaasiyiin, aqoonyahan iyo marti-sharaf kale oo aad u tiro badan, waxana madasha laga jeediyey hadallo lagu faah-faahinayo muhiimadda ay hay’addani qaranka u leedahay iyo sida ay bulshadu ugu intifaaci doonto qorshaha shanta sano ee la dejiyey.

Madaxweyne Muuse Biixi Cabdi oo isaguna madasha daah-furay, ayaa si waafi ah u sharraxay qiimaha ay leedahay inuu qaranku yeesho hay’ad dhawriseed oo qosheyaal cadcad leh oo jeexatay jidkii ay u mari lahayd hiigsigeeda iyo himiladeeda dambe.


Sidoo kale, Madaxweynuhu wuxuu hay’adda dhawrista tayada Jamhuuriyadda Somaliland ku bogaadiyey dedaalka ay sameeyeen iyo hirgelinta qorshaha wax-ku-oolka ah ee ay curiyeen, isaga oo hoosta ka xarriiqay inay si buuxda u garab geli doonaan una taageerayaan sidii ay qosheyaashaasi u noqon lahaayeen qaar higala oo sidooda looga faa’iidaysto.

Guddoomiyaha hay’adda dhawrista tayada Somaliland, Mudane Muuse Xasan Yuusuf oo madasha ka hadlay, ayaa ku dheeraaday heerarkii kala duwanaa ee ay hay’adda tayadu soo martay iyo sida ay hay’ad ahaan iskaga xilsaareen inay curiyaan qorshe hawleed ay muddo shan sano ah ku hawl-galaan, kaas oo si mug leh uga qayb qaadan doona inay bulshadu hesho cunto iyo agab tayo leh oo baadhitaanno lagu sameeyey.

HORSEEDMEDIA