golis

Kulanka isku xirka howlaha socdaalka dalka oo ku soo idlaaday Garoowe

Madaxweyne ku xigeenka Puntland Mudane Axmed Cilmi Cismaan Karaash ayaa furay Shirka isku xirka howlaha laamaha Hay’adda Socdaalka iyo Jinsiyadda dowladda Faderaalka ah ee Soomaaliya, kaasoo ka dhacay magaalada Garowe ee xarunta maamulka Puntland.

Shirkaan oo saddexdii biloodba mar la qabto waxaa looga hadlay howlaha isku xirka Laamaha Hay’adda Socdaalka iyo Jinsidaha, wixii qabsoomay, caqabadaha iyo fursadaha jira ee u baahan in laga faa’idaysto.

Madaxweyne ku xigeenka Puntland waxaa ku wehlinayay kulanka  Agaasimaha guud Hay’adda Socdaalka iyo Jinsiyadaha Soomaaliya Col, Maxamed Aadan Jimcaale (Koofi), ku xigeenada, Agaasimaha guud, Wasiirka Amniga Puntland Cabdisamad Gallan,,madaxda Laamaha Gobolada Hay’adda Socdaalka iyo Jinsidaha (HSJ), Maamulka gobolka Nugaal, Kan degmada Garoowe, Saraakiisha Amniga ee kala duwan, Ururada Bulshada rayidka ah iyo Marti sharaf kale.

Madaxweyne ku xigeenka dowladd Goboleedka Puntland Mudane Axmed Cilmi Cismaan Karaash ayaa bogaadiyay shaqada ay Hay’adda Socdaalka iyo Jinsidaha hayso, waxaana uu tilmaamay inay si dhow u wada shaqeeyaan, loona baahan yahay in ay sii laba jibbaaraan howlaha baaxadda leh ee ay Ummada u hayaan.

Ugu danbayn Madaxweyne ku xigeenka dowlad Goboleedka Puntland ayaa hoosta ka xarriiqay in Puntland iyo Hay’adda Socdaalka ay leeyihiin wada shaqayn wanaagsan, waxaana uu ku ammaanay shaqada Muhiimka ee ay hayaan, isla markaana Puntland diyaar u tahay in mar walba ay xoojiso arimaha wada shaqaynta ay la leedahay hay’ada Socdaalka iyo Jinsiyadda dowladda Faderaalka ah ee Soomaaliya.

Wasiirka Amniga dowlad goboleedka Puntlanda Cabdisamad Gallan ayaa sidoo kale xalay casho sharaf ugu sameeyay magaalada Garoowe wufuuddii ka qaybgashay shirka isku xirka howlaha laamaha Hay’adda Socdaalka iyo Jinsiyadda dowladda Faderaalka ah ee Soomaaliya iyo maamulgoboleedyada,kulankaan oo muhiimad gaar ah u lahaa horumarinta arimaha socdaalka dalka ayaa ku soo dhamaaday jawi wanaagsan iyo is faham leh.

HORSEEDMEDIA