Taliska Ciidanka Booliska dowladda Federaalka Soomaaliya ayaa soo saaray Digniin ku socota Ciidanka dowladda qeybahooda kala duwan, kadib dilal saacadihii lasoo dhaafay Ciidamo ay ka geysteen Magaalada Caasimadda ah ee Muqdisho.
Afhayeenka Booliska Cabditaax Aadan Xasan oo xalay shir Jaraa’id u qabtay Warbaahinta ayaa u sheegay in Ciidanka dowladda aan laga aqbali doonin dhibaateynta shacabka, isla markaana tallaabo adeg la qaadi doono Askarigii dil u geysta qof shacab ah.
Wuxuu sheegay in Ciidamada looga baahan yahay inay dul-qaad muujiyaan, xiliyada ay marayaan waddooyinka mashquulka badan uu ka jiro, ayna joojiyaan rasaasta ay sida sharci darrada u riyadaan, isagoona xusay in tallaabo laga qaadi doono cid kasta oo waxyeeleysa shacabka.
Hay’adda dembi baarista CID-da ayuu caddeeyay Afhayeenka Booliska inay baaris ku wado kiiska oo Ehelada Marxuumiinta ay Gal-dacwadeed ka furteen CID-da, isagoonta intaas kusii daray in Ciidanka dhibka geysteen ay aadeen dhinaca wadada aada Isgoyska Bakaaraha ee Muqdisho.
Afhayeen Cabdifitaax Aadan Xasan ayaa sheegay inay aad uga xun yihiin falka dhacay, isla markaana waxaa uu tacsi u diray qoyska Sakariye Maxamud Kalafoge iyo Sowdo Maxamud Kalafoge, wuxuuna xusay in Natiijada kasoo baxda baaritaanka socda ay shacabka Soomaaliyeed la wadaagi doonaan.
Horseed Media
