Ciidanka Puntland oo hawlgallo sifayn ah ka wada togga Baallade ee Cal-miskaad.

Ciidanka Difaaca Dowladda Puntland ayaa maanta ku jira hawlgal lagu sifeynayo firxadka argagixisada ee ku dhuumanayey qeybo kamid ah togga Baallade ee buuraleeyda Cal-miskaad.

Qoraal ka soo baxay hawlgalka Hillaac ee ciribtirka Daacish ayaa lagu sheegay in ciidamadu beegsadeen godad ay ku dhuumaalaysanayeen dhagar-qabayaal katirsan malayshiyaadka Daacish.

“Ciidanku waxay maanta ku jiraan hawlgal ay firxadka Argagixisada kaga sifeynayaan qaybaha u danbeeya ee ay ku dhuumanayeen togga Baallade“, Ayaa lagu yiri qoraal ka soo baxay taliska hawlgalka Hillaac.

Saraakiil katirsan ciidanka difaaca dowladda Puntland ee ku sugan Cal-miskaad ayaa HM u xaqiijiyey in firxadka Daacish oo u badan ajaaniib, haween iyo carruur ay kujiraan laba god oo kuyaal Baallade.