Washington Horseed Media – Xoghayaha Difaaca Mareykanka Pete Hegseth ayaa sheegay in dagaalka Mareykanka iyo Iran…
Washington Horseed Media – Xoghayaha Difaaca Mareykanka Pete Hegseth ayaa sheegay in dagaalka Mareykanka iyo Iran uu ilaa hadda ku kacay ku dhowaad $37.5 bilyan, iyadoo Pentagon-ku uu Congress-ka ka dalbanayo maalgelin dheeraad ah oo gaareysa $87 bilyan.
Hegseth oo hor tagay Guddiga Miisaaniyadda Aqalka Senate-ka ayaa sheegay in $67 bilyan oo ka mid ah lacagta la codsaday loo adeegsan doono hawlgallada militari ee Bariga Dhexe, isagoo ku dooday in lacagtu muhiim u tahay dib-u-buuxinta hubka iyo diyaar-garowga ciidamada.
Dhageysiga ayaa dhowr jeer hakad galay kadib markii dibadbaxayaal ka soo horjeeday dagaalka ay carqaladeeyeen kulanka. Ugu dambeyn waxaa dhacay muran kulul oo dhex maray Hegseth iyo Senator Gary Peters, oo ku eedeeyay maamulka Mareykanka inuu abuurayo “dagaal aan dhammaad lahayn.”
Xoghayaha Difaaca ayaa sheegay in haddii aan la ansixin maalgelinta cusub ay saameyn ku yeelan karto tababarka ciidamada, bixinta mushaaraadka askarta iyo awoodda Mareykanka ee sii wadista hawlgallada militari.
Mareykanka ayaa sheegay in saddex askari oo Mareykan ah lagu dilay colaadda Iran, halka Pentagon-ku uu sheegay in tirada dhimashada ciidamada Mareykanka ay gaartay 18 tan iyo markii dagaalku billowday 28-ka Febraayo.
Qaar ka mid ah xildhibaannada Dimuqraadiga ayaa dhaliilay codsiga lacagta badan, iyagoo sheegay in dowladda ay mudnaanta siinayso kharashaadka dagaalka xilli shacabka Mareykanka ay wajahayaan dhibaatooyin dhaqaale.
Dagaalka Mareykanka iyo Iran ayaa dib u billowday toddobaadkii hore kadib markii uu burburay xabbad-joojin hore, iyadoo labada dhinac ay sii wadaan weerarro is-daba joog ah oo ka dhacay Bariga Dhexe.
