Dagaallo culus ayaa ka socda Yemen, iyadoo ciidamada daacadda u ah dowladda dalka ee caalamku aqoonsan yahay ay qaadeen weerarro rogaal-celin ah oo ka dhan ah fallaagada Xuutiyiinta.
Saraakiisha dowladda Yemen ayaa sheegay in ujeeddadoodu tahay inay dib ula wareegaan caasimadda Sanca, oo muddo gacanta ugu jirta kooxda Xuutiyiinta ee taageerada ka hesha Iran.
Dhanka kale, ugu yaraan 73 qof oo rayid ah ayaa ku dhaawacmay weerarro ay Xuutiyiintu ka geysteen magaalooyin iyo kaabayaal dhaqaale oo ku yaalla koonfurta Sacuudiga. Riyadh ayaa digniin ka soo saartay sii wadidda weerarrada.
Xuutiyiinta ayaa iyaguna sheegay inay iska caabiyeen duullaan ka dhacay gobolka Al-Jawf.
Intaa waxaa dheer, ugu yaraan toddobo qof ayaa lagu dilay duqeyn cirka ah oo lagu qaaday xabsi ku yaalla magaalada Al-Hazm.
Xuutiyiintu waxay ku eedeeyeen Sacuudiga weerarka, iyagoo sheegay in “gardarrada aan looga hari doonin ciqaab la’aan.”
Dagaalladan ayaa loo arkaa xiisadii ugu halista badaneyd ee colaadda Yemen tan iyo markii xabbad-joojin ay Qaramada Midoobay dhexdhexaadisay ay sanadkii 2022 soo afjartay dagaalladii baaxadda lahaa.
