Mareykanka ayaa Khamiistii sheegay in uu bilaabay weeraro ka dhan ah kooxaha uu sheegay inay xiriir la leeyihiin Daacish (ISIS) ee Nigeria.
Weerarrada aan horay loo arag ee Maalinta Kirismaska ayaa yimid kadib toddobaadyo uu Madaxweynaha Mareykanka Trump iyo Xisbigiisa Jamhuuriyiinta ku eedeenayeen kooxda inay “xasuuq” ku wadaan masiixiyiinta dalkaasi.
Waa faragelintii ugu horreysay ee si toos ah militariga Mareykanka uu ku sameeyo waddanka ay colaaduhu ka jiraan.
Labada dal midna weli ma uusan shaacin macluumaad sax ah oo ku saabsan bartilmaameedyada la weeraray iyo khasaaraha duqeymaha.
Magaalooyinka la duqeeyey waxaa kamid ah magaalada Jabo oo ku taal waqooyi-galbeed ee Gobolka Sokoto, laakiin ma jiraan unugyo xiriir la leh Daacish oo halkaas ku sugan.
Intaa waxaa u dheer, Trump iyo taageerayaashiisa Mareykanka waxay ugu yeereen “xasuuq shacabka Kirishtaan ah” ee sheegeen inuu ka socdo Nigeria, waxay badanaa xusaan aag gebi ahaanba ka duwan goobaha la duqeeyey.
Madaxweynaha Mareykanka Donald Trump ayaa Khamiistii qoraal uu soo dhigay boggiisa Bulshada ku shaaciyay in Mareykanku uu bilaabay “weeraro badan” oo ka dhan ah “goobaha ISIS” ee waqooyi-galbeed Nigeria.
Taliska Mareykanka ee Afrika ayaa qoraal uu soo saaray ku sheegay in qiimeyn hordhac ah oo lagu sameeyay duqeymaha ay muujisay in “argagixiso badan oo ISIS ah lagu dilay xeryaha Daacish”.
War qoraal ah oo ay soo saartay subaxnimadii Jimcaha, Wasaaradda Arrimaha Dibadda ee Nigeria ayaa xaqiijisay weerarrada waxayna sheegtay inay bartilmaameedsadeen kooxaha fadhigoodu yahay waqooyi-galbeed ee dalka.
