Halka uu ku danbeyn doono heshiiskan ayaa saacadihii u dambeeyay aan la hubin. Xabad joojinta ayaa hadda bilaaban doonta maalinta beri ah ee Axadda.
Xukuumadda Israa’iil oo dhammaystiran, ayaa saacadihii hore ee Sabtidii, u codaysay xabbad-joojinta Gaza iyo heshiiska la-haystayaasha ka dib saacado wada-tashi ah. Sidaasi waxaa ku dhawaaqay xafiiska ra’iisul wasaare Benjamin Netanyahu.
“Dowladdu waxay ogolaatay qorshaha soo celinta la haystayaasha” ayaa lagu yiri war ka soo baxay xafiiska ra’iisul wasaare Benjamin Netanyahu, isagoo intaa ku daray in heshiiska lagu joojinayo dagaalka lagula jiro Xamaas uu dhaqan gelayo maalinta Axadda ah.
24 wasiir ayaa u codeeyay heshiiska, waxaana diiday 8 wasiir.
Xabad joojinta ayaa dhaqan gali doonta berri oo Axad ah. Markaa waa in dagaalka iyo duqeynta Gaza la joojiyo.
Sida ku cad heshiiska, oo la ansixiyay ka dib shir golaha wasiirrada oo soo dhammaaday saacadihii hore ee Sabtida, xabbad joojin lix toddobaad ah ayaa dhaqangeli doonta Axadda, inkastoo su’aalaha muhiimka ah ay weli jiraan, oo ay ku jiraan magacyada 33 la haystayaal ah oo la sii daayo lixda toddobaad ee ugu horreeya. wejigii xabbad joojinta iyo cidda weli nool oo iyaga ka mid ah.
Heshiiskan oo ay horay u ansixiyeen golaha wasiirada amniga ayaa yimid in kasta oo Jimcihii dib u dhac lama filaan ah uu ku yimid taasoo dhalisay cabsi laga qabo in daqiiqadihii ugu dambeeyay is afgaranwaaga u dhexeeya Israa’iil iyo kooxda Falastiniyiinta uu heshiiska burburiyo.
Nuxurka heshiiska
Arbacadii ayay ahayd markii ra’iisul wasaaraha Qatar uu ku dhawaaqay in heshiis xabad joojin ah ay wada gaareen Israa’iil iyo ururka Xamaas.
Heshiiska xabad joojinta ayaa loo qeybiyay saddex waji. Wejiga koowaad ayaa ku bilaamaya xabbad joojin lix toddobaad ah oo bilaabanaysa Axadda. Inta lagu jiro muddadan ayaa 33 ka mid ah ku dhawaad 100 ka mid ah la haystayaasha Israa’iil ee ku jira gacanta Xamaas ayaa la sii dayn doonaa, halka ilaa 2,000 maxaabiis Falastiiniyiin ah la sii daayo.
Ciidamada Israa’iil ayaa sidoo kale si tartiib tartiib ah ugu bixi doona aagga difaaca ee u dhow xudduudda, waxaana Falastiiniyiinta loo ogolaan doonaa inay ku noqdaan waqooyiga Gaza.
Wada xaajoodka wajiga labaad ayaa lagu wadaa inuu furmo maalinta 16-aad ee xabbad joojinta. Waxaana laga wada hadlayaa siideynta haystayaasha haray iyo in ciidamada Israa’iilna ay si buuxda uga baxaan marinka Qaza, sida ay sheegtay wakaalada wararka ee AP.
Wajiga saddexaad ayaa ku lug leh soo celinta meydadka la haystayaashii dhintay ee Israa’iil, iyadoo dib u dhiska Qasa uu bilaabmayo. Khubaradu waxay aaminsan yihiin inay u baahan doonto wada xaajood aad u adag si loo gaaro wejiyada labaad iyo saddexaad.
