Ciidamada dowladda Itoobiya iyo xulafadooda ayaa sheegay inay la wareegeen gacan ku haynta magaalada istiraatiijiga ah ee Alamata, oo ka tirsan gobolka Tigray ee waqooyiga Itoobiya, kaddib maalmo ay dagaallo ka socdeen dhowr jiho oo u dhexeeya ciidamada dowladda iyo xoogagga fallaagada.
Tigray Peace Force, oo ah koox hubaysan oo ay ku jiraan dagaalyahanno Tigray ah oo taageersan dowladda federaalka, ayaa bayaan ay soo dhigtay Facebook ku sheegtay inay magaalada Alamata ka qabsadeen xoogagga TPLF, iyagoo kaashanaya ciidanka qaranka Itoobiya.
Dagaallada ayaa toddobaadkii la soo dhaafay si weyn uga sii darayay waqooyiga Itoobiya, iyadoo ay dib u soo cusboonaadeen colaadaha u dhexeeya dowladda federaalka ee uu hoggaamiyo Ra’iisul Wasaare Abiy Ahmed iyo TPLF iyo xulafadeeda.
Dagaalladan cusub ayaa halis geliyay heshiiskii nabadeed ee Pretoria, kaas oo la saxiixay bishii November 2022 si loo soo afjaro dagaalkii sokeeye ee Tigray.
Dagaalkii hore ee socday intii u dhexeysay 2020 iyo 2022 ayaa sababay dhimashada boqolaal kun oo qof, halka malaayiin kalena ay ka barakaceen guryahooda.
Isniintii, Tigray Peace Force ayaa sheegtay in dagaalyahannadeedu ay qabsadeen Alamata, oo ah magaalo istiraatiiji ah oo qiyaastii 120km (75 mayl) koonfur ka xigta Mekelle, caasimadda gobolka Tigray.
Muuqaal ay xaqiijisay wakaaladda wararka Reuters ayaa muujinayay askar dhex socda magaalada Alamata, kuwaas oo watay calanka Itoobiya.
Laba ilo-wareed oo diblomaasiyadeed ayaa sidoo kale Reuters u sheegay in magaalada ay gacanta dowladda u dhacday, halka ilo-wareed xiriir la leh xoogagga mucaaradka ay sheegeen in ciidamadoodu dib uga gurteen magaalada.
Dagaallada oo dib uga qarxay waqooyiga Itoobiya
Dagaallada ugu dambeeyay ayaa billowday toddobaadkii hore, markii xoogagga Tigray ay qaadeen weerar ballaaran.
Waxay la wareegeen saddex garoon diyaaradeed oo ku yaalla Tigray, iyagoo sidoo kale gudaha u galay gobollada deriska la ah ee Cafar iyo Amxaaro.
TPLF ayaa sheegtay in dagaalka ay waddo uu yahay “dagaal is-difaac ah”, iyadoo ciidamada dowladda federaalka ku eedeysay inay weerarro u adeegsanayaan diyaaradaha aan duuliyaha lahayn ee loo yaqaan drones iyo madaafiic culus.
Dowladda Itoobiya iyo dhinacyada kale ee ku lugta leh dagaalka ayaa weli bixinaya warar kala duwan oo ku saabsan xaaladda dhulka iyo cidda gacanta ku haysa goobaha lagu dagaallamayo.
