Ciidamada dowladda Suuriya ayaa la wareegay xabsiga Al-Aqtan, iyadoo dagaalyahannada SDF ay ka baxeen magaalada Raqqa ee waqooyi-bari ee dalkaas, iyadoo lagu heshiiyay xabad joojin.
Dowladda Suuriya ayaa sheegtay inay la wareegtay maamulka xabsiga al-Aqtan, oo ah xarun ku taal magaalada waqooyi-bari ee Raqqa oo ay ku jiraan tiro maxaabiis ah oo ka tirsan Daacish (ISIS), markii ay ka baxeen dagaalyahannada SDF ee ay hoggaamiyaan Kurdiyiinta kadib heshiis xabbad joojin ah.
Wasaaradda Arrimaha Gudaha ayaa warbixin ay Jimcihii soo dhigtay Telegram ku sheegtay in mas’uuliyiinta Maamulka Xabsiyada iyo Xarumaha Asluubta ay la wareegeen maamulka xabsiga oo ku yaal xaruntii hore ee SDF ee Raqqa, ayna bilaabeen baaritaan ku saabsan xaaladaha maxaabiista iyo diiwaankooda, sida ay ku warantay wakaaladda wararka ee SANA oo dawladdu maamusho.
La wareegidda xabsiga iyo joojinta colaadda Raqqa waxay dhacday iyadoo la raacayo heshiis xabad joojin ah oo afar maalmood ah oo dhexmaray dowladda Suuriya iyo SDF, kaasoo dhaqan galay habeenkii Talaadada.
Xabbad joojinta ayaa ka dambeysay markii toddobaadkii hore ay dagaalo xoogleh dhexmareen ciidamada Suuriya iyo kuwa Kurdida ee SDF oo lagala wareegay dhul ballaaran oo ay muddo dheer haysteen.
