Hay’adda Caafimaadka Adduunka ee WHO ayaa ku dhawaaqday inay qabanayso kulan degdeg ah oo ay yeelanayaan…
Hay’adda Caafimaadka Adduunka ee WHO ayaa ku dhawaaqday inay qabanayso kulan degdeg ah oo ay yeelanayaan guddiga xaaladaha degdegga ah, kaddib markii tirada dhimashada cudurka Ebola ay gaartay 131 qof, si looga arrinsado faafitaanka sii kordhaya ee cudurka ka dillaacay bariga Jamhuuriyadda Dimuqraadiga ah ee Congo.
Dillaacan cusub ee Ebola ayaa si weyn uga faafay gobolka Ituri ee dalka Democratic Republic of the Congo, iyadoo la diiwaangeliyey in ka badan 500 oo kiis oo looga shakisan yahay cudurka, xilli saraakiisha caafimaadku sheegeen in xaaladdu tahay mid aad u halis badan, maadaama cudurku uu gaaray magaalooyin waaweyn iyo deegaano ay colaado ka jiraan.
Agaasimaha guud ee WHO, Tedros Adhanom Ghebreyesus, ayaa sheegay inuu si weyn uga walaacsan yahay “xawaaraha iyo baaxadda” uu cudurku ku faafayo, isagoo xusay in tirada kiisaska iyo dhimashadu ay sii kordhi karto maadaama baaritaannada, raadraaca dadka lala xiriiray bukaannada, iyo xog ururintu ay wali socdaan.
Warbixinnadu waxay sheegayaan in laba kiis oo la xaqiijiyey laga helay dalka Uganda, taas oo sare u qaadday cabsi laga qabo in cudurku u gudbo dalal kale oo gobolka ah, Magaalooyinka Kampala iyo Goma ee Congo ayaa kamid ah meelaha hadda laga dareemay faafitaanka, taas oo khubaradu ku tilmaameen xaalad khatar sare leh.
Cudurka hadda dillaacay waxaa sababay nooca Bundibugyo ee Ebola, oo ah nooc dhif ah isla markaana aan weli loo helin tallaal ama dawo si rasmi ah loo ansixiyey. Khubarada caafimaadka ayaa sheegaya in tani ay sii adkaynayso dadaallada lagu xakamaynayo cudurka marka loo eego noocyadii hore ee Ebola.
WHO ayaa sheegtay in kiisaska qaar laga helay shaqaalaha caafimaadka, taas oo muujinaysa in cudurku ku faafayo xarumaha caafimaadka dhexdeeda, taasi oo sare u qaadday baahida loo qabo qalab caafimaad, xarumo karantiil, iyo tababar degdeg ah oo loo sameeyo shaqaalaha caafimaadka ee ku sugan goobaha uu cudurku saameeyey.
Hay’addu waxay sidoo kale sheegtay inay bixisay lacag degdeg ah oo dhan $3.9 milyan si loogu taageero dowladaha Congo iyo Uganda dadaallada lagula tacaalayo xaaladdan, lacagtaas ayaa lagu maalgelinayaa baaritaanno caafimaad, qalabka shaybaarka, wacyigelin bulshada ah, iyo xoojinta la socodka dadka cudurka looga shakiyo.
