Duuliyihii labaad ee diyaaradda dagaalka ee lagu soo riday Iiraan ayaa waxaa soo badbaadiyay ciidamada gurmadka ee Mareykanka 48 saacadood ka dib.
Madaxweynaha Mareykanka Donald Trump ayaa Axaddii sheegay in askari Mareykan ah oo lagu waayay Iiraan kadib markii la soo riday diyaaraddiisii F-15E la badbaadiyay.
Mareykanka iyo Iiraan ayaa ku tartamayay sidii ay u heli lahaayeen duuliyaha muddo laba maalmood ah, iyadoo Tehran ay dadweynaha ugu baaqday inay askariga ku wareejiyaan mas’uuliyiinta, taasoo u muuqatay isku day lagu doonayay in lagu qabto maxbuus dagaal oo Mareykan ah, iyadoo dagaalka Mareykanka iyo Israa’iil ee Iiraan uu galay maalintiisii 37-aad.
Ugu yaraan 2,076 qof ayaa ku dhintay, 26,500 oo kalena way ku dhaawacmeen Iiraan tan iyo 28-kii Febraayo, markaas oo Mareykanka iyo Israa’iil ay markii ugu horreysay weerarro ka geysteen Iiraan, ayna ku dileen Hoggaamiyaha Sare Ayatollah Khamenei iyo dhowr hoggaamiye oo kale oo sare oo militari iyo siyaasadeed.
