Garsoore Soomaali ah oo lagu amaano inuu yahay kan ugu fiican Afrika ayaa la sheegay in loo diiday inuu galo Mareykanka, waxaana dib loogu celiyay Istanbul, Turkiga markii uu ka soo degay Garoonka Diyaaradaha ee Miami si uu uga qeyb qaato Koobka Adduunka 2026.
Cumar Cabdulqaadir Cartan, oo 34 jir ah, waxaa safarkiisa fududeeyay Safaaradda Soomaaliya ee Nairobi, Kenya, oo sheegtay inay siisay baasaboor diblomaasiyadeed si uu uga caawiyo arrimaha la xiriira fiisaha.
Wuxuu ka soo safray Kenya wuxuuna sii maray Turkiga ugana gudbay Miami, kahor inta aan dib loogu celin. Lama sheegin sababta.
FIFA ayaa toddobaadkii hore xaqiijisay in xaaladda fiisaha Cartan si buuxda loo xalliyay, haddana uu diyaar u noqon doono inuu dhex dhexaadiyo ciyaaraha Koobka Adduunka ee FIFA.
Soomaaliya ayaa kamid ah liiska mamnuucidda safarka ee uu soo rogay maamulka Trump, bishii horena wuxuu yiri ‘dhammaantood waa tuugo’ muhaajiriinta Soomaalida ah ee ku sugan Ameerika’. Bishii Janaayo wuxuu qaranka Soomaaliya ugu yeeray ‘waddanka ugu xun adduunka’.
Cartan waxaa loo magacaabay Garsooraha ugu Fiican Afrika 2025 ee Abaalmarinta Xiriirka Kubadda Cagta Afrika (CAF) bishii Nofeembar.
Mareykanka ayaa diiday inuu fiiso siiyo qaar kamid ah kooxda dalka Iiraan si ay uga qayb galaan Koobka Adduunka. Ciyaartoyda Iiraan ayaa awooday inay ka degaan Mexico usbuucii lasoo dhaafay.
