Guddiga doorashooyinka oo aqbalay go’aankii maxkamaddu ku laashay doorashadii Galmudug.

Guddiga Madaxa-bannaan ee Doorashooyinka Qaranka iyo Soohdimaha (GMDQS) ayaa ku dhawaaqay inuu fulinayo go’aanka Maxkamadda Sare ee Soomaaliya ee lagu laalay natiijadii doorashadii isku-sidkanaa ee Golayaasha Deegaanka iyo Golaha Wakiillada Dowlad-Goboleedka Galmudug, wuxuuna guddigu sheegay in go’aanka maxkamadda soo baxay 24-kii Agoosto 2026, iyadoo lagu xukumay in natiijadii doorashada 30-kii Luulyo ka dhacday Galmudug aanay sii jiri karin.

GMDQS ayaa war-saxaafadeed uu soo saaray 25-kii Agoosto ku sheegay inuu si buuxda u tixgelinayo go’aanka Maxkamadda Sare, isagoo xusay in sharciga iyo xeerarka doorashooyinka ay waajib ka dhigayaan in la ixtiraamo go’aannada hay’adaha garsoorka.

Guddiga Doorashooyinka ayaa sidoo kale sheegay inuu dib u furi doono doorashada ku-celiska ah ee ka dhacaysa Dowlad-Goboleedka Galmudug, taasi oo ka dhigan in dhinacyadii ku tartamay doorashadii hore ay mar kale wajihi doonaan hannaan doorasho oo cusub, iyadoo la sugayo jadwalka iyo habraaca rasmiga ah ee doorashada ku-celiska ah.

Go’aanka GMDQS ayaa Galmudug gelinaya marxalad cusub oo siyaasadeed iyo doorasho, iyadoo la filayo in doorashada cusub lagu saleeyo go’aanka Maxkamadda Sare iyo xeerarka doorashooyinka, waxaana guddigu sheegay inuu doorashooyinka xiga u maamuli doono si waafaqsan Dastuurka, sharciga doorashooyinka iyo go’aannada hay’adaha garsoorka.