Rasaas culus iyo qaraxyo xooggan ayaa aroornimadii Sabtida, laga maqlay qaybo badan oo ka mid ah…
Rasaas culus iyo qaraxyo xooggan ayaa aroornimadii Sabtida, laga maqlay qaybo badan oo ka mid ah caasimadda Niger ee Niamey, gaar ahaan agagaarka Garoonka Caalamiga ah ee Diori Hamani iyo madaxtooyada, sida ay ku warrantay wakaaladda Reuters.
Ilo wareedyo dhinaca amniga ah ayaa sheegay in koox ay ku tilmaameen “argagixiso” ay weerartay garoonka, isla markaana ay isku dayday inay jebiso xayndaabka amniga ee ku hareeraysan xarunta madaxtooyada, inkastoo aysan jirin xogo ka madax-bannaan sheegashada dowladda.
Niger waxay muddo sannado ah wajahaysay weerarro ay fuliyaan kooxo jihaad-doon ah oo ay ka mid yihiin Islamic State Sahel Province (ISSP) iyo Jama’a Nusrat al-Islam wal-Muslimin (JNIM), kuwaas oo si gaar ah uga hawlgala xuduudaha Niger, Mali iyo Burkina Faso, iyadoo gobolka Tillabéri ee galbeedka Niger uu noqday mid ka mid ah goobaha ugu daran ee colaadda.
Garoonka Diori Hamani ayaa horey loogu qaaday weerarro waaweyn sanadkan; bishii Janaayo 2026 waxaa garoonka iyo saldhigga milatari ee ku dhow lagu qaaday weerar ay sheegatay dowladda Islaamiga ah, halka warbixinno kale ay sheegeen in JNIM ay sidoo kale weerar ka geysatay garoonka bilihii xigay.
