Ciidanka Ilaalada Kacaanka Islaamiga ah ee Iiraan (IRGC) ayaa digniin culus u diray dalalka martigeliya ciidamada…
Ciidanka Ilaalada Kacaanka Islaamiga ah ee Iiraan (IRGC) ayaa digniin culus u diray dalalka martigeliya ciidamada Mareykanka, iyagoo sheegay in waddan kasta oo dhulkiisa loo adeegsado weerarro ka dhan ah Iiraan uu wajihi doono waxa ay ku tilmaameen “jawaab u dhiganta”, Sida lagu baahiyey warbaahinta dowladda.
Sida ay baahisay wakaaladda wararka ee Tasnim, oo xiriir dhow la leh dowladda Iiraan, IRGC ayaa ugu baaqday dalalkaas inay dhaqaajiyaan qorshayaashooda difaaca madaniga ah, isla markaana ay shacabka ka fogeeyaan xarumaha milatari ee laga yaabo inay bartilmaameed noqdaan haddii colaaddu sii xoogeysato.
Iiraan ayaa sheegtay in ciidamadeedu ay gantaallo iyo diyaarado aan duuliye lahayn (drones) ku weerareen xarunta saadka ee ciidamada Mareykanka ku leeyihiin Camp Arifjan ee dalka Kuwait, iyagoo ku andacoonaya inay halkaas gaarsiiyeen khasaare soo gaaray ciidamada iyo qalabka ku sugnaa.
Dhanka kale, ciidamada Iiraan ayaa sheegay inay sidoo kale beegsadeen saldhigga cirka ee Ali Al Salem Air Base ee Kuwait, iyadoo weerarkaasi sababay in hawlgab noqdaan qaar ka mid ah nidaamyada raadaarka, isla markaana uu burbur gaarsiiyay hangarro lagu dayactiro hubka iyo xarumo lagu kaydiyo diyaaradaha aan duuliyaha lahayn.
