Wasaaradda Difaaca ee Turkiga ayaa sheegtay in gantaal ballistic ah oo laga soo riday Iiraan oo kusoo jeeday hawada Turkiga ay burburiyeen nidaamyada difaaca cirka iyo gantaalada NATO.
War-saxaafadeed ay soo saartay warbaahinta dowladda Iran ayaa lagu sheegay in ciidamada Iran ay beeniyeen in gantaal ku rideen dhulka Turkiga, iyagoo sheegay inay ixtiraamayaan madaxbannaanida Turkiga.
Hadalka Iiraan ayaa yimid ka dib markii Wasaaradda Difaaca Qaranka ee Turkiga ay Arbacadii sheegtay in gantaal ballistic ah oo laga soo riday Iiraan uu kusoo jeeday hawada Turkiga kadib markii uu kasoo gudbay hawada dallalka Suuriya iyo Ciraaq ay burburiyeen nidaamyada difaaca cirka iyo gantaalada ee NATO.
Wasiirka Arrimaha Dibadda Turkiga Hakan Fidan ayaa Arbacadii u gudbiyay cabashadooda dhiggiisa Iiraan, sida ay ku warantay wakaaladda wararka ee Reuters.
NATO waxay cambaareysay falkan, sida ay sheegtay afhayeenka Allison Hart, iyadoo intaas ku dartay in ururkoodu si adag u difaaci doono xulafadooda Turkiye.
Saldhigga Cirka ee Incirlik ee Turkiga waxaa isticmaala ciidamada shisheeye, gaar ahaan kuwa Mareykanka iyo xulafada kale ee NATO. Saldhigga waxaa gacanta ku haya ciidamada cirka ee Turkiga laakiin wuxuu u shaqeeyaa sidii saldhig diyaaradeed oo wadajir ah oo ay leeyihiin Turkiga iyo Mareykanka.
Incirlik wuxuu ahaa goob muhiim u ah saadka iyo taageerada cirka ee hawlgallada uu Mareykanku hoggaaminayo ee Ciraaq intii lagu jiray Dagaalkii Gacanka 1991 iyo markii dambe xarun xamuul oo loogu talagalay hawlgallada Ciraaq iyo Afgaanistaan.
