Wasaaradda arrimaha gudaha ee Urdun ayaa sheegtay in kooxda islaamiga ah ee mucaaradka ah lala xiriiriyay qorshe qaran dumis ah.
Wasaaradda arrimaha gudaha ee Urdun ayaa mamnuucday ururka Ikhwaanul Muslimiinka oo ah mucaaradka ugu caansan dalkaasi Arbacadii, iyadoo albaabada loo laabay xafiisyadooda lagana qaatay hantidooda.
Wasiirka arrimaha gudaha Mazen al-Faraya ayaa sheegay in go’aankan uu jawaab u yahay qorshe qaran dumis ah oo lala xiriiriyay wiil uu dhalay mid ka mid ah madaxda kooxda oo si degdeg ah u dhaqan geli doona.
“Waxaa la caddeeyey in xubnaha kooxdan ay ku shaqeeyaan gudcurka, isla markaana ay ku dhaqaaqaan falal khalkhal gelin kara xasiloonida dalka,” ayaa lagu yiri war ka soo baxay wasaaradda arrimaha gudaha.
Ku dhawaaqista ka dib, booliska ayaa isku gadaamay oo baaray xarunta xisbiga ee caasimadda Cammaan.
Ururka Ikhwaanul Muslimiinka oo laga mamnuucay dalal badan oo Carbeed ayaa muddo tobanaan sano ah si sharci ah uga howlgalayay dalka Urdun.
Fikirka Islaamiyiinta Sunniga ah iyo hadafka la sheegay ee ah in la dhiso khilaafaad hoos timaada shareecada waxay taageero xoogan ku leeyihiin magaalooyinka waaweyn ee Jordan.
Garabka siyaasadeed ee ururka Ikhwaanka ee Urdun, Islamic Action Front (IAF), ayaa guulo la taaban karo ka gaadhay doorashooyinkii baarlamaanka bishii Sebtembar, iyaga oo helay 31 ka mid ah 138 kursi.
