Ka hor kulankii sida weyn loo hadal hayey ee Jimcihii uu la yeeshay Madaxweynaha Ruushka Vladimir Putin, Madaxweynaha Mareykanka Donald Trump ayaa kalsooni ka muujiyey inuu awood u leeyahay inuu horumar la taaban karo ka sameeyo xabbad-joojinta Ukraine.
Putin ayaa soo dhaweyn diiran kala kulmay Trump markii uu ka degay saldhigga Elmendorf-Richardson oo ku yaalla magaalada Anchorage ee gobolka Alaskan.
Laakin majirin wax heshiis ah oo kasoo baxay kulankii saaacado qaatay, Trump iyo Putin ay ka dhoofay goobtaas – iyada oo aan wax guul ah laga gaarin joojinta dagaalka Ukraine.
‘Ma jiro wax heshiis ah oo la gaaray’
Iyadoo la filayey in kulanka uu qaadan doono ku dhawaad 7 saacadood ayaa waxaa lagu soo gaba gabeeyay wax ka yar saddex saacadood. Trump iyo Putin ayaa wadahadallada kadib kula hadlay goob ay isugu yimaadeen saxafiyiin iyagoo soojeediyey hadallo kooban oo hore loo sii diyaariyay. Labada hogaamiye midkoodna wax su’aal ah ma uusan ka jawaabin.
Putin waxa uu sheegay in dalkiisa ay ka go’an tahay soo afjarida dagaalka, balse ay tahay in “sababaha asaasiga ah” iskahorimaadka meesha laga saaro si heshiisku u ahaado mid waara.
Putin ayaa sidoo kale uga digay Ukraine iyo Midowga Yurub inay qaadaan fal “wax u dhimi kara shaqada socota”.
Trump ayaa amaanay “kulanka”, kaas oo uu ku sheegay “Qodobo badan ayaa lagu heshiiyey”. Wuxuu sheegay inay jirto “fursad aad u wanaagsan” – isagoo tixraacaya xabbad-joojin – laakiin wuxuu qiray inay weli jiraan caqabado.
Waxa uu ka digay in ay “ugu dambeyntii ku xiran tahay Ruushka iyo Ukraine” – gaar ahaan Putin iyo Madaxweynaha Ukraine Volodymyr Zelenskyy. “Ma jiro wax heshiis ah ilaa heshiis la gaaro,” ayuu yidhi.
Kulanka ka hor, waxaa si weyn loo saadaalinayay in Putin uu isku dayi doono in uu wadahadal nabadeed ku xaliyo wadahadalka ganacsiga iyo iskaashiga labada dhinac ah ee Mareykanka.
Trump ayaa sheegay in aysan jirin wax wadahadal ah oo ku saabsan ganacsiga uu la yeelanayo Putin ilaa labada dal Ukraine iyo Ruushka ay horumar la taaban karo ka sameeyaan xabbad joojinta.
Qorshahan, si kastaba ha ahaatee, waxa uu u muuqdaa in wax iska bedaleen, iyadoo madaxweynaha Ruushka uu ku sheegay bayaankiisa kulanka kadib inay ka wadahadleen iskaashigooda dhinacyada farsamada iyo hawada.
“Waa iska cadahay in maalgashiga Maraykanka iyo Ruushka iyo iskaashiga ganacsigu uu leeyahay awood aad u weyn. Ganacsiga, digital, tiknoolajiyada sare iyo sahaminta hawada, [oo] waxaan aragnaa in iskaashiga Arctic uu sidoo kale aad u macquul yahay, “ayuu u sheegay suxufiyiinta.
Trump ayaa ugu mahadceliyey Putin waqtigiisa, waxa uu sheegay in uu rajaynayo in ay markale kulmaan dhawaan. Putin ayaa si degdeg ah ugu jawaabay isagoo Ingiriisi ku yiri, “Marka xigta, kulanka wuxuu ka dhici doonaa Moscow”.
