Weerarro gantaallo iyo diyaarado aan duuliye lahayn lagu qaaday saldhig ay ciidamada Mareykanku isticmaalaan
Jordan – Laba askari oo ka tirsan ciidamada Mareykanka ayaa lagu dilay, halka mid saddexaad weli la la’yahay, kaddib weerarro ay Iiraan ku qaaday saldhig ku yaalla dalka Jordan, sida uu Sabtidii shaaciyey Taliska Dhexe ee Ciidamada Mareykanka (CENTCOM).
Tani waa markii ugu horreysay ee ciidamada Mareykanka ay khasaare dhimasho kala kulmaan dagaalka u dhexeeya Mareykanka iyo Iiraan tan iyo bishii Maarso, iyadoo toddobaadkan uu si weyn u sii xoogeystay is-weydaarsiga weerarrada labada dhinac.
Sida lagu sheegay bayaan uu CENTCOM ku baahiyey baraha bulshada, weerarka ayaa dhacay 17-kii Luulyo, xilli ciidamada Mareykanka iyo kuwa ay iskaashadaan ay iska caabinayeen weerarro isugu jiray gantaallo riddo dheer iyo diyaarado aan duuliye lahayn (drones) oo ay Iiraan soo qaaday.
Waxaa sidoo kale la xaqiijiyey in hal askari uu weli ku maqan yahay howlgalka, iyadoo la wado dadaallo lagu baadi-goobayo.
Askar kale oo dhaawacmay
CENTCOM ayaa sheegay in afar askari oo Mareykan ah dhaawacyo soo gaareen lana geeyey isbitaallo ku yaalla Jordan, balse markii dambe laga soo saaray kadib markii xaaladdooda caafimaad ay soo hagaagtay. Ciidamo kale oo dhaawacyo fudud soo gaarayna ayaa dib ugu laabtay shaqadoodii.
Taliska ayaa intaa ku daray inuusan hadda shaacin magacyada askarta la dilay ilaa laga wargeliyo ehelladooda, iyadoo la raacayo habraacyada ciidamada Mareykanka.
Dhanka kale, Aqalka Cad ayaan weli si rasmi ah uga hadlin dhacdadan.
Ciidanka Ilaalada Kacaanka Islaamiga ah ee Iiraan (IRGC) ayaa subaxnimadii Sabtida u sheegay inay fuliyeen weerarka lagu qaaday saldhigga Al-Azraq ee dalka Jordan, oo ay adeegsadaan ciidamada Mareykanka.
IRGC ayaa sheegtay in weerarka lagu adeegsaday gantaallo iyo diyaarado aan duuliye lahayn, isla markaana lagu burburiyey diyaarado dhowr ah oo ku sugnaa saldhigga. Dowladda Mareykanka weli kama aysan jawaabin sheegashadaas.
Xabbad-joojintii oo sii burburaysa
Khasaaraha cusub ayaa imanaya xilli xabbad-joojin jilicsan oo u dhexeysay Mareykanka iyo Iiraan ay toddobaadkan si weyn u burburtay.
Labada dal ayaa is dhaafsanaya weerarro isdaba joog ah, iyadoo Mareykanku qaaday duqeymo xooggan, halka Iiraan ay jawaab uga bixisay weerarro gantaallo iyo diyaarado aan duuliye lahayn. Weerarrada ayaa sii ballaaranaya, waxaana bartilmaameedyo noqday dalal ay ku yaallaan saldhigyo ay ciidamada Mareykanku isticmaalaan.
Dhanka kale, mas’uuliyiin Iiraani ah ayaa sheegay in 12 qof oo rayid iyo ciidan isugu jira lagu dilay dalkaas 24-kii saac ee la soo dhaafay, taasoo tirada dhimashada wajiga ugu dambeeya ee dagaalka ka dhigaysa 50 qof.
Sidoo kale, ku-xigeenka guddoomiyaha gobolka Hormozgan ayaa sheegay in warshad biyaha cusbada looga saaro ay ku burburtay weerar gantaal oo uu Mareykanku fuliyey.
HORSEED MEDIA
