Qareenka u doodaya madaxweynaha Kuuriyada Koonfureed ee shaqada laga joojiyey, Yoon Suk-yeol, ayaa Axaddii sheegay in macmiilkiisu aanu ka qayb geli doonin fadhiga ugu horreeya ee dacwadda kaas oo lagu go’aamin doono in xilka laga qaadi doono ama lagu soo celin doono xafiiska.
Sida ay ku warantay wakaalada wararka ee Yonhap, qareenka ayaa u sababeeyay baaqashada madaxweynaha ee fadhigii ka dhacay xarunta maxkamada dastuuriga ah sababo uu ku tilmaamay amni.
Qareen Yoon Kap-kyun ayaa bayaan uu soo saaray ku yiri: “Walaacyo ayaa soo baxay oo la xiriira amniga iyo dhacdooyinka suurtagalka ah, sidaa darteed madaxweynaha ma awoodo inuu ka qeyb galo dacwadda 14-ka Janaayo,” isagoo raaciyay, “Madaxweynuhu wuxuu doonayaa inuu yimaado (…) isla marka la xaliyo dhibaatooyinka amni.”
Ra’yi ururintii ugu dambaysay ayaa muujisay in 60% dadka Kuuriyada Koonfureed ay aaminsan yihiin in maxkamadda dastuuriga ahi ay xilka ka xayuubinayso Yoon, halka boqolkiiba kuwa ka soo horjeeda xil ka qaadista ay gaadheen ku dhawaad 30%.
Waxaa xusid mudan in baarlamaanka Kuuriyada Koonfureed uu go’aansaday inuu xilka ka xayuubiyo madaxweyne Yoon Suk-yeol, sababtoo ah isku daygiisii ahaa inuu ku soo rogo sharci dagaal horaantii bishii hore, afgambi ay si degdeg ah u fashiliyeen wakiilo.
Go’aanka xil ka qaadista awgeed, Yoon hadda ma awoodo inuu guto waajibaadkiisa, laakiin weli waa madaxweynaha inta laga gaarayo go’aanka maxkamadda dastuuriga ah ee go’aanka xil ka qaadista bartamaha Juunyo.
Horseed Media
