Madaxweynaha Mareykanka Donald Trump ayaa aad u daneynaya in uu heshiiska Nukliyeerka ah la galo Tehran, isaga oo ugu hanjabay dalkaas in uu qaadi doono tallaabo militari iyo canshuur dheeri ah haddii wadahadaladu fashilmaan.
Wakaaladaha wararka ayaa ku waramaya in wadahadaladii u dhaxeeyay Maraykanka iyo Iran ee ku saabsanaa barnaamijka Nukliyeerka ee Tehran uu dhamaaday kadib laba saacadood oo dheeraad ah.
Wakaalada wararka ee AP ayaa sheegtay in wariyayaasheeda ay arkeen kolonyo la rumeysan yahay in uu la socday ergayga Mareykanka Steve Witkoff oo ka sii ambabaxaya xarun ku taal caasimada Cumaan ee Muscat, halkaasi oo uu wadahadalo uga socday.
Wakaalada wararka ee Iran Tasnim ayaa sidoo kale sheegtay in wada hadalada la soo gaba gabeeyay. Ma jiro war rasmi ah oo kasoo baxay.
Wadahadalada maanta ayaa ah wadahadaladii ugu heer sareeyay ee barnaamijka Nukliyeerka Iran tan iyo markii heshiis taariikhi ah oo caalami ah 2015 uu burburay 2018 kadib markii madaxweynaha Mareykanka Donald Trump uu ka baxay heshiiskii ugu horreeyay ee xafiiska.
Wadahadallada hadda socda waxay ku dhacayaan hanjabaado tillaabo millatari oo ka imanaysa Maraykanka, halka saraakiisha Iran ay si isa soo taraysa uga digayaan inay u isticmaali karaan kaydkooda uranium-ka la hodmay si ay ugu adeegsadaan hubka nukliyeerka.
