Maraykanka iyo Iran oo heshiiska nabadda Bariga Dhexe saxiixaya Jimcada.

Warbaahinta caalamka iyo qaar kamid ah dalalka ku hawlan dedaalada nabadda Bariga dhexe ayaa si rasmi ah ugu dhawaaqay in heshiis ballaaran oo xabbad-joojin iyo is-afgarad siyaasadeed laga gaaray xiisadaha ka aloosan mandaqadda Bariga Dhexe, kaddib wada-hadallo la sheegay inay dhexmareen Mareykanka iyo Iiraan.

Ra’iisul Wasaaraha Pakistan ayaa si cad u xaqiijiyey jiritaanka heshiiskaasi, isla markaana inta dhimman maalinimada Jimcada ah lagu dhammaystirayo dalka Zwitzerland ayna ku rajo weynyihiin dhaqan gelintiisa.

Dhanka kalena, Madaxweynaha Mareykanka Donald Trump ayaa sheegay iin la dhammaystiray is-afgarad lagu soo afjarayo colaadaha gobolka, isla markaana dib loo furayo marinka istiraatiijiga ah ee Hormuz, isagoo Maraakiibta caalamka ugu yeeray inay matooradooda dib u shitaan.

Mas’uuliyiin ka tirsan dowladda Iiraan ayaa sheegay in heshiiska uu ka kooban yahay qodobo ahmiyad weyn siin doona danaha Iran iyo guud ahaan awooddeeda mandaqadda Bariga Dhexe.

1. Joojinta xiisadaha militari ee gobolka oo ay ku jirto Lubnaan,
2. Qaadista xayiraadaha dhaqaale iyo kuwa badeed ee saaran Iiraan,
3. Furitaanka marinka Hormuz,
4. dib u eegista joogitaanka ciidamada Mareykanka ee meelaha u dhow Iiraan,
5. In la sii daayo hanti lagu qiyaasay $24 bilyan oo Iiraan laga xayiray.
6. Iyo in Marinka Hormuz ay maamulaan Iran iyo Cumaan

Sidoo kale wararka ayaa sheegaya in Iiraan ay oggolaatay in wada-hadallo dheeraad ah laga yeesho barnaamijkeeda Nukliyeerka, iyadoo aan heshiiska lagu soo hadal qaadin arrimaha gantaallada ballistic-ga iyo taageerada kooxaha gobolka.

Dowladda Iiraan ayaa sheegtay in dhaqangelinta heshiiska ay ku xirnaan doonto fulinta ballanqaadyada la xiriira qaadista cunaqabateynta dhaqaale, inkastoo aan weli jirin xaqiijin madax-bannaan oo ka timid hay’adaha caalamiga ah ama dowladda Mareykanka.