Ciidamada Difaaca Dadweynaha Ciraaq (PMF), oo ah dallad ay ku mideysan yihiin maleeshiyaad xiriir dhow la leh Iran, ayaa sheegay in Maraykanka iyo Sacuudigu ay Arbacadii duqeeyeen xarumo ay ku leeyihiin guud ahaan dalka Ciraaq.
PMF ayaa sheegtay in duqeyntu ay bartilmaameedsatay xarunteeda ku taalla Basra, halkaas oo ay ku dhinteen kuna dhaawacmeen dad tiro ahaan aan la cayimin.
Kooxdu waxay duqeymaha ku tilmaantay “xaalad aad khatar u ah oo sii kordhinaysa xiisadda”, waxayna sheegtay in weerarradu ay xadgudub ku yihiin madax-bannaanida Ciraaq.
Maraykanka ayaa maleeshiyaadka ay Iran taageerto ee Ciraaq ku eedeeyay weerarradii dhowaan lagu qaaday ciidamada Maraykanka ee gobolka, iyo sidoo kale weerarro lagu beegsaday kaabayaasha shidaalka ee Sacuudiga.
Sacuudi Carabiya ayaa Arbacadii xaqiijisay in ay qayb ka ahayd duqeymaha Maraykanku ku qaaday maleeshiyaadka Ciraaq ee ay Iran taageerto.
Riyaad ayaa sheegtay in tallaabadaasi ay jawaab u ahayd weerarro diyaaradaha aan duuliyaha lahayn ah oo ay maleeshiyaad Ciraaqi ah isku dayeen in ay ku bartilmaameedsadaan xarumaha shidaalka ee ku yaalla Sharqiya iyo Riyadh.
Wasaaradda Difaaca Sacuudiga ayaa qoraal ay soo dhigtay barta X ku sheegtay in “xaqa ay u leedahay is-difaacid”.
“Boqortooyadu waxay carrabka ku adkaynaysaa in aysan doonayn inay xiisadda sii kordhiso, balse ay ka jawaabi doonto gardarro kasta oo loo geysto,” ayaa lagu yiri qoraalka.
