Wasiirka arrimaha dibada ee Mareykanka Rubio ayaa sheegay in Washington aysan aqbali doonin canshuur laga qaado maraakiibta mara marin biyoodka Hormuz.
Iiraan ayaa horey u sheegtay inay rabto inay ka qaado maraakiibta “khidmo adeeg oo badda ah.”
Xoghayaha Arrimaha Dibadda ee Mareykanka Marco Rubio ayaa gaaray Imaaraadka Carabta, isagoo bilaabay kulamo taxane ah oo uu la yeelanayo xulafada Mareykanka ee Khaliijka.
Safarka ayaa diiradda lagu saarayaa Is-afgaradka Mareykanka iyo Iiraan (MoU) waxaana loo arkaa inuu fursad siinayo Rubio inuu dhegeysto cabashada ku saabsan heshiiska ee ka imanaya hoggaamiyeyaasha Khaliijka Carabta. Wuxuu ka degay Abu Dhabi halkaas oo uu kula kulmi doono hoggaamiyeyaasha Imaaraadka, kahor inta uusan u ambabixin Kuwait iyo Baxrayn.
Ka dib markii uu gaaray Imaaraadka, Rubio wuxuu sheegay in Mareykanku uusan aqbali doonin wax lacag ah ama khidmad ah oo ka dhacda Gacanka Hormuz, isagoo ku celiyay in heshiis kasta oo kama dambeys ah oo lala galo Tehran uu ka mamnuucayo Iiraan inay lacag ka qaadato marinka.
Hadalka Rubio ayaa yimid ka dib markii madaxa wadahadallada Iiraan Mohammad Bagher Ghalibaf uu Talaadadii u sheegay warbaahinta dowladda Iiraan in “qof walba waa uu ogaan doonaa in maamulka Gacanka Hormuz uusan waligiis dib ugu laaban doonin sidii uu ahaa kahor dagaalka.”
Iiraan ayaa mar walba muujinaysay inay rabto inay soo bandhigto nidaam ay ugu yeerto “kharashyada badda” ee marin biyoodka kadib marka uu dhammaado muddada wadahadalka laba bilood ah ee ay la leedahay Mareykanka. Heshiiska is-afgaradka ayaa sheegaya in Tehran ay oggolaan doonto in maraakiibta ay halkaasi maraan lacag la’aan muddo 60 maalmood ah oo keliya.
