Dowladda militariga ee Mali ayaa ku yaboohaysa $3.5 milyan qofkii keena macluumaad horseeda xariga ama dilka Iyad Ag Ghaly. Militariga ayaa sidoo kale abaalmarin yar siinaysa qofkii keena xogta tuhmanayaasha kale, oo ay ku jiraan gooni-u-goosadka Tuareg.
Ciidamada Milatariga ee xukuma Mali ayaa ku yaboohay abaalmarin dhan $3.5 milyan qofkii macluumaad keena si loo xiro ama loo dilo Iyad Ag Ghaly, oo madax ka ah laanta Sahel ee kooxda argagixisada ah ee al-Qaacida oo dalkaas weeraro waaweyn ka geystay bishii Abriil.
Ghaly, oo ah madaxa Jama’at Nusrat al-Islam wal-Muslimin (JNIM), waxaa raadinaya dhowr waddan oo ku yaal gobolka Sahel ee Afrika, kuwaas oo dhowr kamid ah ay xukumaan ciidamada militariga.
Bishii Abriil, JNIM waxay ku biirtay ciidamada fallaagada Tuareg si ay u qaadaan weeraradii ugu weynaa ee ka dhanka ah dowladda Mali in ka badan toban sano. Weeraradii isku mar dhacay waxay dileen dhowr qof, oo uu ku jiro Wasiirka Difaaca Sadio Camara.
JNIM waa kooxda ugu weyn ee Islaamiyiinta ah ee la dagaallama ciidamada militariga ee Sahel, halkaas oo ay ka howlgalaan kooxo badan oo Islaamiyiin iyo gooni-u-goosad ah oo xagjir ah.
