Muslimiinta Rohingya ee ku nool Myanmar (Burma) ayaa la daalaa dhacaya koror aad u weyn oo ku yimid heerarka gaajada iyo nafaqo-darrada, arrintaas oo ku riixday Qaramada Midoobay inay ugu baaqdo bulshada caalamka in si degdeg ah loo kordhiyo taageerada bani’aadamnimo.
Hay’adda Cuntada Adduunka ee Qaramada Midoobay ayaa sheegtay in “gobolka Rakhine uu la tacaalayo dhacdooyin halis ah oo ka kooban dagaal, go’doon, iyo hoos u dhac ku yimid maalgelinta gargaarka bani’aadamnimo, taas oo keentay koror aad u weyn oo ku yimid heerarka gaajada iyo nafaqo-darrada.”
Barnaamijka Qaramada Midoobay ee Cuntada ayaa xaqiijiyay in 57% qoysaska ku nool gobolka Rakhine aysan awoodin inay daboolaan baahiyahooda aasaasiga ah ee cuntada, taas oo kor u kacday marka loo eego 33% bishii Diseembar 2024.
Wuxuu Barnaamijka Cuntada Adduunka saadaaliyay in xaaladda waqooyiga Rakhine ay noqon doonto mid aad uga daran, sababo la xiriira dagaalka iyo caqabadaha ku saabsan gaarsiinta gargaar.
Barnaamijku wuxuu sheegay in qoysaska lagu khasbayo inay qaadaan tallaabooyin quus ah si ay u noolaadaan, sida: kordhinta deymaha, ku tiirsanaanta tuugsiga, rabshadaha guryaha ka dhaca, ka tegista iskuullada, xiisado bulsho, iyo xitaa ka ganacsiga dadka.
Michael Dunford, oo ah wakiilka Barnaamijka Cuntada Adduunka iyo agaasimaha qaranka ee Myanmar, ayaa sheegay in dadku ay ku jiraan wareeg aan dhammaad lahayn, go’doon, sababo la xiriira dagaalka, lagana xayiray ilihii nololeed, isla markaana aan haysan shabakad badbaado bani’aadamnimo. Waxaan maqalnaa sheekooyin murugo leh oo ku saabsan carruur ooyaysa gaajo darteed iyo hooyooyin ka tanaasulaya cuntooyinkooda. Qoysasku waxay isku dayayaan wax kasta oo ay awoodaan, laakiin ma awoodaan inay keligood ka badbaadaan xaaladdan.”
Wuxuu intaas ku daray in Barnaamijka Cuntada Adduunka uu ku qasbanaaday bishii Abriil 2025 inuu joojiyo taageerada badbaadada u ah in ka badan hal milyan oo qof guud ahaan Myanmar, sababo la xiriira yaraanta maalgelinta.
Isagoo sii hadlaya ayuu yiri: “In kasta oo kheyraadka ay sii yaraanayaan, haddana Barnaamijka Cuntada Adduunka wuxuu ka shaqeynayaa dib u bilaabista bixinta taageero kooban oo badbaado u ah nolosha meelaha ugu daran ee ay dhibaatadu saameysay.”
Horseed Media
