Afar ka mid ah toddobada xubnood ee shaqaalaha saldhigga ayaa lagu amray inay galaan dayax-gacmeedka SpaceX Crew Dragon ee ku xiran ISS, iyagoo xiran dharkooda hawada sare.
NASA ayaa Jimcihii ku amartay cirbixiyeennada saaran Saldhigga Caalamiga ah ee Hawada Sare (ISS) inay galaan meel ammaan ah isla markaana isu diyaariyaan daadgureyn, kadib walaac laga muujiyay hawo bax ka jira saldhigga.
Afhayeenka NASA, Bethany Stevens, ayaa ku qortay barta X in marinka isku xira qaybta adeegga ee Zvezda Service Module, oo loo yaqaan PrK, uu muddo la wajahayey dillaacyo iyo hawo bax. Waxay sheegtay in wakaaladda hawada sare ee Roscosmos ee Ruushku leeyahay ay dadaal badan ku bixisay xakamaynta dhibaatadaas, balse dillaacyadu ay horey u jireen oo NASA ka warhaysay.
Afar ka mid ah toddobada xubnood ee shaqaalaha saldhigga ayaa lagu amray inay galaan dayax-gacmeedka SpaceX Crew Dragon ee ku xiran ISS, iyagoo xiran dharkooda hawada sare.
Stevens waxay sheegtay in taxaddar dheeraad ah awgiis, NASA ay ku amartay dhammaan afarta xubnood ee kooxda SpaceX Crew-12 iyo cirbixiyeenka NASA Chris Williams inay galaan diyaargarow amni oo sare inta lagu guda jiro dayactirka.
Waxay sidoo kale sheegtay in wakaaladda Roscosmos ee Ruushka loo qorsheeyay inay fuliso shaqada dayactirka.
Stevens ayaa intaas ku dartay in NASA iyo Roscosmos ay si wadajir ah uga shaqeynayaan ogaanshaha sababta dhabta ah ee keentay dillaacyada, iyadoo Roscosmos ay hadda maareyneyso xaaladda iyada oo adeegsanaysa tallaabooyin farsamo iyo dayactirro qayb-qayb ah oo joogto ah.
Waxay ugu dambayn sheegtay in NASA ay sii waddo wada shaqeynta dhiggeeda Ruushka iyo dhammaan la-hawlgalayaasha caalamiga ah ee taageera ISS, si loo helo xal waara oo si buuxda u soo afjara dhibaatadan.
Horseed Media
