Baakistaan iyo taliska Taliban ee Afgaanistaan labaduba waxay sheeganayaan inay burburiyeen dhowr fariisimo oo xuduudka ah, dhanka kalena ay gaarsiiyeen khasaare xooggan.
Pakistan ayaa xirtay xuduudaha ay la wadaagto Afgaanistaan iyadoo ay socdaan rasaas xooggan oo xalay labada dal ay is dhaafsanayeen, mas’uuliyiinta Pakistan ayaa sheegay Axaddii.
Waxaa la xiray xadka Torkham ee gobolka waqooyi-galbeed ee Khyber Pakhtunkhwa iyo Chaman ee gobolka koonfur-galbeed ee Balochistan, sida ay sheegeen saraakiisha ammaanka.
Ciidamada Afgaanistaan ayaa rasaas ooda uga qaaday fariisimaha Pakistan galinkii dambe ee Sabtidii, sida ay xaqiijisay xukuumadda Taalibaan, iyadoo sheegtay in ay uga aargoosanayso duqeymaha ay Pakistan ka geysatay Afgaanistaan horaantii todobaadkan.
Warbaahinta maxaliga ah ee Pakistan ayaa sheegtay in ciidamadeeda ammaanku ay qabteen ugu yaraan 19 ka mid ah xarumaha xudduudaha Afgaanistaan, iyadoo loo adeegsaday madaafiic culus, taangiyo, diyaarado dagaal iyo kuwa aan duuliyaha lahayn.
Afhayeenka guud ee xukuumadda Taalibaan, Zabihullah Mujahid, ayaa sheegay in ciidamadoodu ay qabsadeen 25 fariisimo oo ciidamada Pakistan ah iska horimaadkii xalay dhacay.
Milatariga Pakistan ayaa sheegay in 23 ka mid ah askartooda lagu dilay iska horimaadka, islamarkaana ay dileen in ka badan 200 oo dagaalyahanada Afgaanistaan ah. Dhankeeda, Taliban ayaa sheegtay in sagaal askari oo ka tirsan dhankooda laga dilay iyagoo sidoo kale sheegtay inay dileen 58 askari oo Pakistan ah.
Labada maamul ee Pakistan iyo taliska Taliban ee Afgaanistaan ka jira ayaa sheeganaya inay khasaare xooggan gaarsiiyeen dhinacyada ka soo horjeeda, inkastoo dagaalku u muuqdo mid hadda inta badan loo soo afjaray.
