Khan iyo xaaskiisa ayaa beeniyay eedeymo ah inay si khaldan u sheegeen qiimaha hadiyadaha dawladda, oo ay ku jiraan dahabka, iyo inay ka faa’iideysteen.
Ra’iisul Wasaarihii hore ee Pakistan Imran Khan iyo xaaskiisa Bushra Bibi ayaa lagu xukumay 17 sano oo xabsi ah kadib markii maxkamad ku taal Pakistan ay ku heshay dambi ah inay si sharci darro ah u haysteen oo ay u iibinayeen hadiyado qiimo leh oo dowladeed.
Hoggaamiyihii hore ee 73 jirka ah ayaa soo noqday ra’iisul wasaaraha Pakistan laga bilaabo 2018 ilaa Abriil 2022, markaas oo xilka laga qaaday cod kalsooni kala noqosho ah.
Xukunka, oo la riday Sabtidii, wuxuu soo afjaray sheeko sannado badan socotay oo lagu eedeeyay labada qof inay iibinayeen hadiyado kala duwan – oo ay ku jiraan dahabka ay bixisay dowladda Sacuudi Carabiya – qiimo aad uga hooseeya qiimaha suuqa. Waxay beeniyeen dhammaan dacwadaha.
Si loo ilaaliyo hadiyadaha ka imanaya dalalka shisheeye, sharciga Bakistaan wuxuu farayaa mas’uuliyiinta inay ku iibsadaan qiimaha suuqa iyo inay caddeeyaan faa’iidada ka soo xaroota iib kasta.
Laakiin dacwad oogayaashu waxay sheegeen in lamaanuhu ay ka faa’iideysteen alaabta kadib markii ay ku iibsadeen qiimo yar oo ah $10,000, marka la barbar dhigo qiimaha suuqa ee $285,521.
Taageerayaasha Khan ayaa si degdeg ah u cambaareeyay xukunka, iyadoo afhayeenkiisa Zulfikar Bukhari uu sheegay in “mas’uuliyad dambiyeed la saaray iyada oo aan la helin wax caddayn ah”.
