Qarax ayaa ka dhacay meel u dhow magaalada Sarmada ee gobolka Idlib, waqooyi-galbeed Suuriya.
Wasaaradda Difaaca ayaa sheegtay in hub iyo haraadiga dagaalka lagu keydinayay goobtaas si ku-meel-gaar ah, ka hor inta aan meel kale loo qaadin.
Mas’uuliyiinta Suuriya ayaa sheegay in ugu yaraan 14 qof ay dhinteen, halka 11 kalena ay ku dhaawacmeen qarax ka dhacay Arbacadii goob ku-meel-gaar ah oo loo adeegsanayay kaydinta hub iyo haraadiga ka dhashay dagaalkii sokeeye ee dalkaasi muddada dheer socday.
Qaraxu wuxuu ka dhacay meel u dhow magaalada Sarmada, oo ku taalla gobolka Idlib ee waqooyi-galbeed Suuriya.
Wasaaraddu waxay sidoo kale sheegtay in qaar ka mid ah shaqaalaheeda ay ku jiraan dadka ku dhaawacmay qaraxa.
Maadaama goobtu ay ahayd meel ay yaalliin walxo si fudud u qarxi kara, qaraxii hore waxaa xigay qaraxyo kale iyo dabab, kuwaas oo adkeeyay dadaallada gurmadka iyo samatabbixinta. Qiiq ayaa muddo ka kacayay goobta uu qaraxu ka dhacay Arbacadii.
Mas’uuliyiintu weli ma aysan shaacin waxa sababay qaraxa.
Qaraxan ayaa noqday dhacdadii labaad ee noocan ah ee dhimasho keenta oo bishan ka dhacda gobolka Idlib.
1-dii Sebtembar, shan qof ayaa ku dhintay, halka tiro kale ay ku dhaawacmeen, kaddib markii gaari siday rasaas iyo saanad ciidan uu ku qarxay magaalada Binnish.
Suuriya ayaa dhawaan kasoo baxday in ka badan toban sano oo dagaal sokeeye ah, kaddib markii ciidamadii daacadda u ahaa madaxweynaha cusub, Ahmed al-Sharaa, ay xukunka ka tuureen Bashar Assad, isla markaana ay la wareegeen magaalada Dimishiq.
Gobolka Idlib ayaa ka mid ahaa meelihii sida weyn ugu waxyeelloobay dagaalkii muddada dheer ka socday Suuriya.
