Ruushka ayaa sheegay inuu muddo saddex maalmood ah hakad gelinayo weerarrada ka dhanka ah Kyiv, xilli ay socdaan dadaallo nabadeed oo ay hoggaaminayaan ergayada Maraykanka Steve Witkoff iyo Jared Kushner.
Afhayeenka Kremlin-ka, Dmitry Peskov, ayaa warbaahinta dowladda u sheegay Sabtidii in madaxweynaha Ruushka Vladimir Putin uu amar ku bixiyay in aan wax weerar ah lagu qaadin Kyiv muddo saddex maalmood ah.
Wuxuu sheegay in hakadku uu bilaabanayo saqda dhexe ee Sabtida.
Tallaabadan ayaa timid kaddib markii madaxweynaha Ukraine, Volodymyr Zelenskyy, uu isaguna ballanqaaday in Ukraine ay hakad gelin doonto weerarrada cirka inta ay socdaan wada-hadalladu.
“Si la mid ah booqashooyinkii hore ee diblomaasiyadeed ee dhinaca Maraykanka, waxaan xaqiijin doonnaa in hawada Ruushka ay si caadi ah u shaqeyso, si wada-xaajoodyadu ay si nabad ah ku yimaadaan,” ayuu yiri Zelenskyy.
Wuxuu intaas ku daray: “Waxaan ka walaacsannahay ammaankooda, ee kama walaacsanin Ruushka.”
Kushner iyo Witkoff oo gaaray Moscow
Ergayada Maraykanka Jared Kushner iyo Steve Witkoff ayaa Sabtidii gaaray magaalada Moscow.
Sida ay sheegtay wakaaladda wararka dowladda Ruushka ee Tass, waxaa garoonka diyaaradaha ku soo dhaweeyay ergayga Ruushka Kirill Dmitriev.
Saacado ka hor, madaxweynaha Maraykanka Donald Trump ayaa sheegay inuu Kushner, oo ah wiilka uu sodogga u yahay, iyo ganacsade Witkoff u dirayo Moscow iyo Kyiv, iyagoo wata qorshe lagu soo afjarayo dagaalka.
“Waxay wataan soo jeedin lagu soo afjarayo dagaalka,” ayuu Trump u sheegay wariyeyaasha Jimcihii, markii wax laga weydiiyay safarka labada nin.
Kushner iyo Witkoff ayaa Trump u matalay dadaallada nabadeed ee Bariga Dhexe, sidoo kalena waxay door hoggaamineed ka qaateen dadaallada lagu doonayo in lagu soo afjaro dagaalka Ukraine.
Trump ma uusan faahfaahin ka bixin qorshaha la filayo, oo ay ku jirto su’aasha ah in Ukraine ay dhul u wareejin doonto Ruushka, arrintaas oo uu madaxweynaha Maraykanku horey u soo jeediyay.
Hase yeeshee, wuxuu sheegay: “Waxaan haynaa fikrad nabadeed.”
Ergayada Maraykanka iyo booqashada Kyiv
Zelenskyy ayaa Jimcihii hore u sheegay in Kushner iyo Witkoff ay Axadda iman doonaan Ukraine, kaddib marka ay wada-hadallo kula yeeshaan mas’uuliyiinta Ruushka magaalada Moscow.
Warbixinno warbaahineed oo dhowaan soo baxay ayaa su’aal geliyay in labada ergay ay dhab ahaantii u safri doonaan Ukraine.
Inkasta oo ay dhowr jeer Moscow u tageen kulamo ay la yeesheen mas’uuliyiinta Ruushka, labada ergay ee Maraykanka ah ayaan booqan Kyiv tan iyo markii Trump mar kale loo doortay madaxweynaha sannadkii hore.
Trump ayaa xilligii uu ololaha ku jiray ballanqaaday inuu kusoo afjari doono dagaalka Ukraine hal maalin gudaheed, dagaalkan oo hadda galay sannadkiisii shanaad.
Hase yeeshee, wuxuu mar dambe sheegay in soo afjaridda dagaalku ay ka adag tahay sidii uu markii hore filayay.
Trump ayaa horey ugu eedeeyay Ukraine duullaanka Ruushka, wuxuuna sidoo kale sheegay in “dhibaato shakhsiyadeed” oo u dhexeysa hoggaamiyeyaasha labada dal ay qayb ka tahay sababta dagaalku u sii socdo.
