Xiisadda Bariga Dhexe ayaa gashay marxalad cusub kaddib markii Sacuudiga uu qaaday duqeymo lagu beegsaday magaalada dekedda leh ee Xudeyda (Hodeidah) ee galbeedka Yemen. Weerarka ayaa yimid maalmo uun kadib markii fallaagada Xuutiyiinta ay ku dhawaaqeen inay xannibaad badeed ay ku soo rogeen maraakiibta Sacuudiga, taasoo sare u qaadday cabsida laga qabo in dagaalku ku fido marin-biyoodka muhiimka ah ee Badda Cas.
Horseed Media | Reuters
Isbahaysiga milatari ee uu hoggaamiyo Sacuudiga ayaa si rasmi ah u xaqiijiyay inuu qaaday duqeymo ka dhan ah bartilmaameedyo ku yaalla magaalada xeebta ah ee Xudeyda (Hodeidah) ee galbeedka Yemen, isagoo sheegay in weerarradu ay ku wajahnaayeen goobo militari oo loo arkayay inay khatar ku yihiin maraakiibta ganacsiga ee Badda Cas.
Xaqiijinta Sacuudiga ayaa timid saacado kadib markii telefishinka Al Masirah ee ay maamulaan Xuutiyiinta uu sheegay in duqeymo lagu qaaday gobolka Xudeyda, taasoo dhalisay walaac ku saabsan in dekedda muhiimka ah ee magaalada la beegsaday.
Hase yeeshee, isbahaysiga Sacuudigu wuxuu beeniyay in dekedda Xudeyda la duqeeyay.
“Ma aanan beegsan dekedda magaalada Xudeyda. Dhammaan dekedaha gobolka waxay weli u furan yihiin maraakiibta,” ayuu isbahaysigu ku sheegay bayaan ay baahisay telefishinka Al-Arabiya.
Bayaanka ayaa sidoo kale lagu sheegay in goobaha la burburiyay ay ahaayeen xarumo militari oo lala xiriiriyay hanjabaado ka dhan ah maraakiibta ganacsiga ee mara Badda Cas.
Ilaa hadda, lama hayo warar madax-bannaan oo xaqiijinaya khasaaraha ka dhashay weerarrada, mana jirto faahfaahin rasmi ah oo ku saabsan tirada dadka ku dhintay ama ku dhaawacmay.
Duqeymahan ayaa daba socda hadal adag oo ay Xuutiyiintu ku dhawaaqeen horaantii toddobaadkan, iyagoo sheegay inay bilaabeen “xannibaad badeed” ka dhan ah Sacuudiga, isla markaana ay bartilmaameedsan doonaan maraakiibta la xiriirta boqortooyada. Isbahaysiga Sacuudigu wuxuu markaas ka digay inuu si adag uga jawaabi doono tallaabo kasta oo halis gelisa ammaanka maraakiibta ganacsiga.
Maalmihii u dambeeyay, Xuutiyiintu waxay sheegteen inay weerareen laba markab oo shidaal oo Sacuudi ah oo marayay Badda Cas. Dowladda Sacuudiga ayaa xaqiijisay in mid ka mid ah maraakiibtaasi uu dab qabsaday, balse shaqaalihii saarnaa ay badbaadeen.
Khatar ku wajahan marin-biyoodka caalamiga ah
Xudeyda waxay ku taallaa meel istaraatiiji ah oo u dhow marin-biyoodka Bab al-Mandab, halkaas oo ay maraan qayb weyn oo ka mid ah ganacsiga caalamiga ah iyo maraakiibta shidaalka. Khubarada ayaa ka digaya in haddii colaaddan ay sii fido, ay saameyn weyn ku yeelan karto isu socodka maraakiibta, qiimaha tamarta iyo silsiladaha ganacsiga caalamiga ah.
Dhacdooyinkan ayaa sidoo kale muujinaya burburka xabbad-joojintii aan rasmiga ahayn ee muddada dheer u dhexeysay Sacuudiga iyo Xuutiyiinta tan iyo 2022, iyadoo xiisadda gobolka ay sii xoogeysaneyso xilli ay Bariga Dhexe ka jiraan colaado kale oo la xiriira Iran iyo xulafadeeda.
