Saddex nin oo Israa’iiliyiin ah ayaa la sii daayay subaxnimadii hore ee Sabtidii, taasoo qayb ka ahayd heshiiskii xabbad joojinta ee Gaza iyadoo lagu beddelay 369 maxaabiis falastiiniyiin ah.
Saddexda la haystayaasha ee la sii daayay ayaa kala ah: Iair Horn, oo 46 jir ah, haystana laba dhalasho oo u kala dhashay Israa’iil iyo Argentina; Sagui Dekel Chen oo 36 jir ah oo u dhashay Maraykanka & Israa’iil iyo Alexander (Sasha) Troufanov oo 29 jir ah oo haysta dhalashooyinka Israa’iil iyo Ruushka.
Kooxihii ugu horreeyay ee maxaabiis falastiiniyiin ah ayaa waxyar kadib bas lagu geeyay magaalada Ramallah ee daanta galbeed.
Taas beddelkeeda, 369 falastiiniyiin ah ayaa laga sii daayay xabsiyada Israa’iil waxaana loo gudbiyay magaalada Ramallah ee daanta galbeed. Sida laga soo xigtay Xafiiska Warfaafinta Maxbuuska ee xiriirka la leh Xamaas, 36 ka mid ah ayaa ku jiray xabsi daa’im.
Waa markii lixaad ee la is dhaafsado tan iyo markii xabad joojinta ay dhaqan gashay 19-kii Janaayo, ilaa hadda, 21 la haystayaal ah iyo in ka badan 730 maxaabiis falastiiniyiin ah ayaa la sii daayay intii lagu jiray wajigii koowaad ee xabbad joojinta.
