Muqdisho (Horseed Media) – Dowladda Federaalka Soomaaliya ayaa magaalada Muqdisho ku qabatay aqoon-is-weydaarsi saddex maalmood socday…
Muqdisho (Horseed Media) – Dowladda Federaalka Soomaaliya ayaa magaalada Muqdisho ku qabatay aqoon-is-weydaarsi saddex maalmood socday oo lagu diyaarinayay Istaraatiijiyadda Qaran ee Isdhexgalka iyo Marinnada Ganacsiga Gobolka.
Aqoon-is-weydaarsiga, oo qabsoomay 11–13 Agoosto, ayaa diiradda lagu saaray sidii Soomaaliya loogu xiri lahaa suuqyada Geeska Afrika, Bariga Afrika iyo guud ahaan qaaradda, iyadoo la horumarinayo dekedaha, waddooyinka, xuduudaha iyo habraacyada fududeynta ganacsiga.
Ra’iisul Wasaare Ku-xigeenka Soomaaliya Saalax Axmed Jaamac, oo furay kulanka, ayaa sheegay in Soomaaliya ay haysato fursad ay ku noqon karto marin ganacsi oo isku xira Afrika iyo suuqyada caalamka, sababo la xiriira halka ay juqraafi ahaan ku taallo iyo xeebteeda dheer.
“Afrika maanta waa mid ka mid ah suuqyada ugu waaweyn dunida, Soomaaliya-na waxay haysataa fursad ay ku noqoto buundo isku xirta Afrika iyo caalamka intiisa kale,” ayuu yiri Saalax.
Kulanka waxaa ka qaybgalay Wasiirka Maaliyadda Biixi Iimaan Cige, Wasiirka Ganacsiga iyo Warshadaha Jamaal Maxamed Xasan, mas’uuliyiin ka socday wasaaradaha Hawlaha Guud, Maaliyadda iyo Amniga Gudaha, xubno ka tirsan Golaha Sharci-dejinta Bariga Afrika, madaxda mashruuca SHIIP iyo khubaro farsamo.
Doodaha ayaa lagu gorfeeyay horumarinta marinnada ganacsiga, isku-xirka dekedaha iyo waddooyinka, hagaajinta kastamyada iyo xuduudaha, iyo dhimista caqabadaha dib u dhiga isu-socodka badeecadaha iyo maalgashiga.
Istaraatiijiyaddan ayaa muhiimad gaar ah u leh Soomaaliya, xilli dalku xoojinayo ka-mid-noqoshadiisa Bulshada Bariga Afrika (EAC), isla markaana uu doonayo inuu ka faa’iidaysto Aagga Ganacsiga Xorta ah ee Qaaradda Afrika (AfCFTA). Soomaaliya waxay xubin buuxda ka noqotay EAC bishii Maarso 2024.
Hirgelinta qorshaha ayaa la filayaa inay ganacsatada Soomaaliyeed u furto suuqyo waaweyn, hoos u dhigto kharashaadka gaadiidka iyo ganacsiga, isla markaana kordhiso maalgashiga. Hase yeeshee, natiijada istaraatiijiyadda waxay ku xirnaan doontaa maalgelinta kaabayaasha, amniga waddooyinka, isku-dubbaridka hay’adaha iyo hirgelinta habraacyo xuduudeed oo hufan.
HORSEED MEDIA
