Spain ayaa ahayd kooxda si buuxda u maamushay kulanka, iyadoo kubadda haysatay boqolley aad u sarreysay isla markaana abuurtay fursado badan oo goolal loo filan karay.
East Rutherford, New Jersey – Xulka qaranka Spain ayaa markii labaad taariikhda ku guuleystay Koobka Adduunka, kadib markii ay 1-0 kaga adkaadeen kooxda difaacaneysay horyaalnimada ee Argentina ciyaartii kama dambaysta ahayd ee Koobka Adduunka 2026.
Ciyaarta oo ahayd mid aad u adag ayaa 90-kii daqiiqo ee caadiga ahaa ku dhammaatay barbaro goolal la’aan ah, inkastoo Spain ay si buuxda u maamulaysay ciyaarta, kubadda haysatay muddooyinka ugu badan isla markaana weerarro isdaba joog ah ku qaaday goolka Argentina. Si kastaba ha ahaatee, goolhaye Emiliano Martínez iyo daafacyada Argentina ayaa muddo dheer iska caabiyey cadaadiska joogtada ah ee La Roja.
Goolka guusha ayaa yimid daqiiqaddii 106-aad ee waqtiga dheeriga ah (Extra Time), markaas oo weeraryahanka beddelka ku soo galay Ferran Torres uu si deggan shabaqa u dhex dhigay kubbad uu Nico Williams madax ugu soo celiyey isagoo ka faa’iideystay kubbad sii baxaysay. Goolkaas ayaa noqday kii kala saaray labada xul, isla markaana Spain u xaqiijiyey hanashada koobka adduunka.
Spain ayaa ahayd kooxda si buuxda u maamushay kulanka, iyadoo kubadda haysatay boqolley aad u sarreysay isla markaana abuurtay fursado badan oo goolal loo filan karay. Weeraradooda aan kala joogsiga lahayn ayaa cadaadis joogto ah saaray difaaca Argentina, inkastoo goolku dib u dhacay ilaa waqtiga dheeriga ah.
Dhibaatada Argentina waxaa sii kordhiyey markii khadka dhexe ee kooxda, Enzo Fernández, la siiyey kaarka cas qaybtii labaad ee ciyaarta, taasoo ku khasabtay inay 10 ciyaaryahan ku dhammaystaan kulanka. Casaankaas ayaa si weyn u fududeeyey in Spain sii xoojiso weerarradeeda daqiiqadihii ugu dambeeyey.
Dhanka kale, kabtanka Argentina Lionel Messi, oo 39 jir ah, ayaa rajeynayey inuu koobka adduunka mar kale kor u qaado maadaama kulankan uu ahaa kii ugu dambeeyey ee uu u ciyaaro dalkiisa. Hase yeeshee, riyadiisii ahayd inuu ku soo afjaro waayihiisa caalamiga ah isagoo koobka qaaday ayaa meesha ka baxday, iyadoo Spain ay u diidday difaacashada horyaalka adduunka.
Guushan ayaa noqotay tii labaad ee Spain ku hanato Koobka Adduunka, iyadoo dib u xusuusisay guushii taariikhiga ahayd ee sanadkii 2010. Sidoo kale waxay xaqiijisay in jiilka cusub ee Spain uu sii wado guulihii waaweynaa ee kubadda cagta Yurub iyo caalamkaba, halka Ferran Torres uu magaciisa ku qoro bogagga dahabiga ah ee taariikhda kubadda cagta Spain, isagoo dhaliyey goolkii keenay koobka adduunka.
HORSEED MEDIA
