Ciidanka Suuriya ayaa sheegay in ciidamadoodu ay la wareegeen Deir Hafer, Maskana iyo tobanaan magaalo iyo tuulooyin kale oo ku yaal bariga Aleppo iyadoo Ciidamada Kurdida ee SDF ay ka baxeen deegaano horleh.
Wasaaradda Arrimaha Gudaha ayaa sheegtay in ciidamada amniga gudaha ee la geeyay Deir Hafer ay qabteen kayd hub ah oo ay lahayd SDF intii lagu jiray baaritaannada amniga.
Ciidanku waxay ku dhawaaqeen aagga galbeed ee Webiga Yufraad inuu yahay aag milatari oo xiran, iyadoo labada dhinacba ay isku eedeynayaan xadgudubyo waxayna soo sheegayaan in dhowr ka mid ah ciidamadooda lagu dilay dagaallo soo cusboonaaday.
Ciidanka Suuriya ayaa sheegay in ciidamadoodu ay la wareegeen aagga al-Rasafa iyo qalcaddeeda taariikhiga ah ee ku taal baadiyaha koonfureed ee Raqqa.
Wakaaladda wararka ee dawladda ee SANA ayaa sidoo kale sheegtay in ciidanku ay qabsadeen toddobo tuulo oo ku hareeraysan, isla markaana ay ku dhow yihiin garoonka diyaaradaha ee Tabqa.
Dhanka kale, Madaxweynaha Suuriya Axmed al-Sharaa ayaa soo saaray wareegto si rasmi ah ugu aqoonsanaysa Kurdiyiinta “luqad qaran” iyo in dib loogu soo celiyo dhalashada dhammaan Kurdiyiinta Suuriya.
