Israa’iil si rasmi ah uma aysan sheegan mas’uuliyadda weerarrada lagu qaaday saldhigga diyaaradaha Abu al-Duhur ee gobolka Idlib, oo qiyaastii 70 kiiloomitir u jira xadka Turkiga.
Ergeyga Maraykanka Tom Barrack ayaa duqeymaha ku tilmaamay “sii xumeyn aan loo baahnayn”.
Siddeed duqeyn oo ay diyaaradaha Israa’iil fuliyeen ayaa aroornimadii Talaadada lala beegsaday saldhig diyaaradeed oo aan hadda la isticmaalin, kuna yaalla gobolka Idlib ee waqooyi-galbeed Suuriya, sida ay sheegtay warbaahinta dowladda Suuriya.
Telefishinka dowladda ee Al-Ikhbariya ayaa sheegay in duqeymuhu waxyeelleeyeen dhabaha diyaaradaha iyo goobo lagu kaydiyo agabka milatariga ee saldhigga Abu al-Duhur, kaas oo qiyaastii 70 kiiloomitir u jira xadka Turkiga.
Turkiga ayaa ah xulafo muhiim ah oo taageera dowladda ku-meelgaarka ah ee Suuriya, taas oo talada dalka la wareegtay kaddib markii madaxweynihii hore Bashar al-Assad xilka looga tuuray weerar militari oo degdeg ah bishii December 2024.
Warbaahinta dowladda Suuriya, oo soo xiganaysa ilo militari, ayaa sheegtay in “diyaaradaha duullaanka ee Israa’iil ay aroortii hore beegsadeen dhabaha diyaaradaha” saldhigga, iyagoo fuliyay “siddeed duqeyn”.
Wararku waxay intaas ku dareen in duqeymuhu waxyeelleeyeen kaabayaasha saldhigga, balse aysan jirin wax khasaare ah oo nafeed oo la soo sheegay.
Saldhigga Abu al-Duhur muddo ka badan toban sano looma adeegsan saldhig milatari oo si joogto ah u shaqeeya. Wakaaladda wararka Reuters ayaa soo xigatay ilo militari oo aan la magacaabin, kuwaas oo sheegay in tan iyo markii Assad xukunka laga tuuray loo adeegsanayay xarun lagu tababaro ciidamada cusub ee Suuriya.
Ilaa hadda, Israa’iil si rasmi ah ugama aysan hadlin weerarrada.
Maraykanka iyo Suuriya oo cambaareeyay weerarka
Duqeymaha ayaa yimid wax yar kaddib booqasho ay wafdi militari oo Turki ah ku tageen garoonka diyaaradaha, sida uu sheegay Syrian Observatory for Human Rights.
Hay’adda fadhigeedu yahay UK ayaa sheegtay in booqashadu qayb ka ahayd dadaallo lagu doonayo in dib loogu hawlgeliyo saldhigga.
Tom Barrack, oo ah safiirka Maraykanka ee Turkiga isla markaana ah ergeyga gaarka ah ee madaxweynaha Maraykanka u qaabilsan Suuriya iyo Ciraaq, ayaa cambaareeyay duqeymaha Israa’iil qoraal uu ku daabacay barta X.
Wasaaradda Arrimaha Dibadda Suuriya ayaa iyaduna cambaareysay weerarka, iyadoo ku tilmaantay “fal gardarro ah oo aan wax cudurdaar ah lahayn”.
Wasaaraddu waxay ugu baaqday beesha caalamka iyo Golaha Ammaanka ee Qaramada Midoobay inay “mowqif adag ka qaataan xadgudubyada soo noqnoqda ee Israa’iil ku hayso madaxbannaanida Suuriya”.
Waxay sidoo kale sheegtay in weerarrada Israa’iil ay sii socdeen tan iyo December 2024, xilli Suuriya ay “muujisay dulqaad, kana shaqaysay xoojinta xasilloonida iyo ka fogaanshaha sii xumaanshaha xaaladda”.
Turkiga ayaa sidoo kale si xooggan u cambaareeyay duqeymaha Israa’iil, isagoo ugu baaqay “beesha caalamka inay qaadato mowqif ka go’aan badan si loo joojiyo gardarrada sii kordheysa ee Israa’iil ka waddo Suuriya”.
Xiriirka Israa’iil iyo Turkiga oo xiisad ka dhex jirto
Tan iyo markii Bashar al-Assad xilka laga tuuray, Israa’iil waxay boqolaal weerar oo cirka ah ka fulisay gudaha Suuriya.
Ciidamada Israa’iil ayaa sidoo kale galay aagga kala-qaybinta ee ay Qaramada Midoobay ilaaliso, kaas oo tan iyo 1974 kala saarayay ciidamada Israa’iil iyo Suuriya ee ku dhow Buuraleyda Golan ee ay Israa’iil haysato.
Ciidanka Israa’iil ayaa sidoo kale si joogto ah u sameeyay duullaano ay gudaha ugu sii gudbeen dhulka Suuriya.
Mas’uuliyiinta Israa’iil waxay sheegeen inay doonayaan inay ciidamadooda ku sii hayaan waxa ay ugu yeereen “aag amni” oo ay iyagu si gaar ah u qeexeen, kaas oo ku yaalla koonfurta Suuriya.
Turkiga ayaa Israa’iil ku eedeeyay inay isku dayayso inay khalkhal geliso Suuriya iyo maamulkeeda cusub. Ankara ayaa dowladda cusub ka caawinaysay tababarka ciidamadeeda iyo dhismaha hay’adaha dowladda iyo kaabayaasha dalka.
Wasiirka Difaaca Israa’iil, Israel Katz, ayaa si toos ah uga digay madaxweynaha Turkiga Recep Tayyip Erdogan, isagoo sheegay in Israa’iil aysan oggolaan doonin tallaabooyin xoojinaya awoodda militari ee Suuriya, haddii ay taasi khatar ku noqon karto Israa’iil.
