Maxkamad ku taalla Suuriya ayaa dil ku xukuntay madaxweynihii xilka laga tuuray, Bashaar Al-Asad, iyadoo uusan maxkamadda goob joog ka ahayn. Xukunka ayaa yimid in ka badan sannad iyo bar kadib markii xukunkiisii la riday, isaga iyo qoyskiisuna ay u baxsadeen Ruushka.
Maxkamad Suuriyaan ah ayaa Talaadadii dil ku xukuntay madaxweynihii hore ee dalka, Bashaar Al-Asad, iyadoo maqane ah.
Al-Asad ayaa xilka laga tuuray bishii Diseembar 2024, kaddib markii xoogagga mucaaradka ay gudaha u galeen Dimishiq, taasoo soo afjartay in ka badan shan iyo konton sano oo ay dalka ka talinayeen qoyska Al-Asad.
Isaga iyo qoyskiisa ayaa u baxsaday Ruushka, halkaas oo magangelyo siyaasadeed lagu siiyay, xilli maamulka cusub ee Suuriya uu bilaabay inuu daba galo mas’uuliyiin hore oo lagu eedeeyay dambiyo ay geysteen intii uu socday dagaalkii sokeeye ee dalka.
Maxaa maxkamaddu ka sheegtay Al-Asad?
Al-Asad ayaa lagu helay dambiyo ay ka mid yihiin “dil qorshaysan oo ula kac ah oo loo geystay in ka badan hal qof iyo carruur, jirdil, xarig aan sharci ahayn iyo dambiyo ka dhan ah aadanaha.”
Garsooruhu wuxuu sheegay in doorka Al-Asad ee dambiyadaas uu ahaa “qofka ugu dambeeya ee mas’uulka ka ah go’aan-qaadashada, isaga oo hay’adaha dowladda u abaabulay inay dambiyadaas geystaan.”
Xukunka waxaa soo saartay Maxkamadda Dambiyada ee Afraad ee Dimishiq, waxaana si toos ah looga akhriyey telefishanka dowladda Suuriya.
Al-Asad, oo dhashay 1965, ayaa madaxweyne noqday sannadkii 2000, kaddib geeridii aabbihii, Hafez Al-Asad.
Wuxuu sii watay xukunkii tobannaan sano socday ee qoyskiisa, isaga oo ilaalinayay awoodda bulshada laga tirada badan yahay ee Alawiyiinta oo ku dhex nool Suuriya oo u badan Muslimiinta Sunniga ah.
Xukunkiisa wuxuu sidoo kale ku dhisnaa xiriir dhow oo ay Suuriya la lahayd Iran, iyo siyaasad si weyn uga soo horjeedday Israa’iil iyo Maraykanka.
Dowladda Suuriya ayaa Ruushka ka dalbatay inuu u soo gacan geliyo Al-Asad.
Walaalkii, Maher Al-Asad, iyo dhowr mas’uul oo kale oo ka tirsanaa dowladdii xilka laga tuuray ayaa sidoo kale dil lagu xukumay iyaga oo maqane ah.
Waxaa lagu helay dambiyo ay ka mid yihiin dil qorshaysan iyo jirdil sababay dhimasho.
