Qarax khasaare nafeed sababay ayaa ka dhacay waddada isku xirta magaalooyinka Boosaaso iyo Dhaadaar, kaddib markii…
Qarax khasaare nafeed sababay ayaa ka dhacay waddada isku xirta magaalooyinka Boosaaso iyo Dhaadaar, kaddib markii miino dhulka lagu aasay lala beegsaday ciidamo ka tirsan Puntland oo marayay halkaasi. Qaraxa ayaa sababay dhimasho iyo dhaawac, iyadoo goobta ay ka dhasheen xaalado amni oo degdeg ah.
Ilo amni ayaa xaqiijiyay in dadka ku dhintay qaraxa uu ka mid yahay Taliyihii Saadka Ururka Dayax Jaamac Maxamed Caduur (Afdhishiike) iyo laba askari oo kale oo la socday gaariga la beegsaday. Dhimashada saraakiishan ayaa si weyn looga dareemay ciidanka Puntland, maadaama ay ahaayeen xubno firfircoon oo ka tirsan howlgalada amniga.
Sidoo kale, qaraxa waxaa ku dhaawacmay in ka badan afar askari, kuwaas oo loo qaaday isbitaallada ku yaalla Boosaaso si loogu sameeyo daryeel caafimaad. Xaaladda qaar ka mid ah dhaawacyada ayaa lagu sheegay mid u baahan la tacaalid dheeri ah, iyadoo ciidamada amnigu ay adkeeyeen sugidda ammaanka waddada uu qaraxu ka dhacay.
Dhacdadan ayaa ku soo beegmeysa xilli Puntland ay weli dagaal kula jirto kooxda IS ee ku dhuumaaleysanaysa Buuraha Calmiskaad. Mas’uuliyiinta amniga ayaa sheegay in ay sii wadi doonaan howlgallada ka dhanka ah kooxaha hubeysan, si loo xaqiijiyo amniga waddooyinka iyo badbaadada ciidamada iyo shacabka.
