Madaxweynaha Mareykanka Donald Trump ayaa ku dhawaaqay inuu 25 boqolkiiba canshuur ah ku soo rogay badeecadaha Hindiya, iyo sidoo kale ciqaab aan la cayimin oo uu ku soo rogayo iibsashada saliidda Ruushka iyo qalabka militariga.
Trump ayaa ku dhawaaqay in amarkan uu dhaqan galayo Jimcaha, isaga oo sheegay in ay lagama maarmaan tahay in la beddelo dheelitir la’aanta ganacsiga ee muddada dheer.
“In kasta oo Hindiya ay tahay saaxiib, haddana waxaan leenahay ganacsi yar sababtoo ah canshuurtooda ayaa aad u sarreysa,” ayuu yiri Trump.
Madaxweynaha ayaa sidoo kale ku eedeeyay Hindiya inay qalab ciidan iyo saliid ka soo iibsatay Ruushka, taasoo uu sheegay inay maalgelinayso dagaalka Ruushka ee Ukraine. Wuxuu damacsan yahay inuu ku soo oogo “ciqaab” dheeri ah oo bilaabmaya Jimcaha taasoo qayb ka ah bilaabista canshuuraha maamulkiisa kusoo rogay dalal badan.
Dowladda Hindiya ayaa bayaan ay soo saartay Arbacadii ku sheegtay inay tixgelisay go’aanka tacriifadda ee Trump ayna daraasaynayso saamaynta ay ku yeelan karo.
