Madaxweynaha Mareykanka Donald Trump ayaa dib u cusbooneysiiyay hanjabaaddiisa ah inuu “qarxin doono” kaabayaasha dhaqaalaha rayidka…
Madaxweynaha Mareykanka Donald Trump ayaa dib u cusbooneysiiyay hanjabaaddiisa ah inuu “qarxin doono” kaabayaasha dhaqaalaha rayidka ee Iiraan, oo ay ku jiraan dhammaan warshadaha biyaha lagu nadiifiyo ee dalka, taasoo ah tallaabo halis gelin doonta ilaha biyaha ee malaayiin qof, khubaraduna ay sheegayaan inay sharci darro noqon doonto.
Trump wuxuu si joogto ah uga digayay Iiraan weerarro suurtagal ah oo Mareykanka uu ka geysan karo xarumaha tamarta iyo korontada, laakiin Isniintii, wuxuu ku daray saldhigyada biyaha liiska bartilmaameedyada hanjabaaddiisii ugu dambeysay.
Sharciga caalamiga ah si cad ayuu u mamnuucayaa in goobaha rayidka laga dhigo “halbeeg weerar ama aargoosi”.
Trump ayaa markii ugu horreysay soo saaray hanjabaad ah inuu bartilmaameedsanayo xarumaha korontada iyo kaabayaasha Iiraan 21kii Maarso, isagoo sidoo kale xukuumada Tehran siiyay waqti kama dambays ah oo 48 saacadood ah inay dib u furaan Marinka Hormuz.
Madaxweynaha Mareykanka ayaa markii dambe dib u dhigay waqtiga kama dambaysta ah shan maalmood ka hor inta uusan mar kale kordhin ilaa 6da Abriil.
Toddobaadkii la soo dhaafay, Trump wuxuu ku dooday in Iiraan ay “baryayso” in heshiis la gaaro, halka wararkaas oo dhan ay beenisay dowlada Iran.
In kasta oo Tehran ay qiratay inay heshay soo jeedin xabbad joojin ah oo 15-dhibcood ah oo ka timid Washington iyada oo loo marayo dhexdhexaadiyayaal, haddana dhowr mas’uul oo Iiraaniyiin ah ayaa beeniyay in wax wadahadallo toos ah oo la yeesheen Mareykanka.
