Madaxweynaha Mareykanka ayaa toddobaadyadii u dambeeyay diiradda saarayay bulshada Soomaaliyeed ee Minnesota, isagoo jeediyay hadallo aflagaado ku ah dadka iyo dalka Soomaaliya.
Madaxweynaha Mareykanka Donald Trump ayaa Talaadadii weerar afka ah ku qaaday muhaajiriinta Soomaalida ah, iyadoo mas’uuliyiinta federaalku ay isu diyaarinayaan inay qaadaan olole ballaaran oo ku wajahan boqolaal Soomaali ah oo aan sharci lahayn oo ku nool gobolka Minnesota.
Isagoo weeraray wariyeyaasha, Trump wuxuu sheegay inuusan rabin muhaajiriinta Soomaalida ah inay sii joogaan Mareykanka, isagoo ku andacoonaya in Soomaalida “aysan waxba kusoo kordhin” Mareykanka iyagoo ku tiirsan caydha. Trump ma uusan soo bandhigin wax caddayn ah oo taageeraya eedayntaasi.
Tani waxay ahayd tii ugu dambeysay ee weerarro aflagaado ah oo uu madaxweynaha Mareykanka ku qaaday bulshada Soomaalida ee dalkaas. Wuxuu hadallo la mid ah ku soo dhigay baraha bulshada toddobaadkii hore.
Trump ayaa sidoo kale si isdaba joog ah u bartilmaameedsaday Ilhaan Cumar, oo ah wakiilka Kongareeska oo ah muwaadin Mareykan ah oo asal ahaan ka soo jeeda Soomaaliya.
Madaxweynuhu wuxuu u muuqday inuu diiradda saarayo soogalootiga ka imanaya waddamada soo koraya hadallo ama siyaasado adag, marka laga reebo dadka caddaanka ah ee Koonfur Afrika, oo uu sheegay inuu soo dhaweenayo.
Isagoo la hadlayay wariyeyaasha ka dib shirkii Golaha Wasiirada Mareykanka ee Talaadadii, Trump wuxuu sheegay inuusan rabin Soomaalida inay sii joogaan Mareykanka, isagoo ku tilmaamay “qashin“.
Mareykanka wuxuu joojiyay socdaalka 19 waddan oo loo arkay “khatar sare”, isagoo soo xiganaya toogashadii toddobaadkii hore ee lagu dilay laba xubnood oo ka tirsan Ilaalada Qaranka oo uu geystay muwaadin Afgaanistaan u dhashay. Dhammaadkii Oktoobar, maamulka Trump wuxuu hoos u dhigay tirada qaxootiga ee Mareykanka uu aqbali doono sanadka soo socda oo noqon doona 7,500 qof oo kaliya – tiradan oo ugu yar tan iyo markii la dhaqan geliyey Sharciga Qaxootiga 1980.
Kadib, Talaadadii, warbaahinta Mareykanka ayaa sheegtay in Hay’adda Socdaalka iyo Kastamka Mareykanka (ICE) ay howlgal ka fulin doonto xaafadaha Soomaalida maalmaha soo socda.
Qoraal uu Talaadadii ku qoray bogga X, Guddoomiyaha Gobolka Minnesota Tim Walz ayaa dhaleeceeyay qorshaha Trump.
Mas’uuliyiinta magaaladu Minneapolis waxay sidoo kale cambaareeyeen weerarka Madaxweyne Trump uu ku qaaday bulshada Soomaalida shir jaraa’id oo uu qabteen Talaadadii, waxayna ballanqaadeen inaysan la shaqeyn doonin wakiillada ICE ee sameynaya baaritaannada muhaajiriinta.
Xildhibaan Jamal Osman oo ka tirsan Golaha Deegaanka Minneapolis, oo ka yimid Soomaaliya markii uu ahaa 14 jir, ayaa shirka ka yiri: “Waan ogahay in qoysas badan ay cabsanayaan … maamulka Minneapolis ayaa garab taagan shacabka Soomaaliyeed.”
