Madaxweynaha Mareykanka ayaa sheegay in salaasada soo socota ay qaadi doonaan weeraro xoogan hadii Iiraan aysan furin marin biyoodka Hormus.
Madaxweynaha Mareykanka Trump ayaa dib u cusbooneysiiyay hanjabaaddiisii ahayd inuu “duqeynmo aan horey loo arag” ku qaadi doono Iiraan haddii ay sii waddo xidhitaanka Marinka Hormuz, isagoo sheegay in Mareykanku uu burburin doono warshadaha korontada ee dalka, buundooyinka.
Kanaalka wararka ee Mareykanka ee Fox News ayaa la wadaagay faallooyin cusub oo ka yimid Trump oo ku saabsan weerarrada suurtagalka ah ee lagu qaadayo kaabayaasha dhaqaalaha Iiraan.
Weriyaha Fox News Trey Yingst ayaa ku warramay in Trump uu taleefan ugu sheegay: “Haddii aysan heshiis gaarin, oo si dhakhso ah, waxaan ka fiirsanayaa inaan wax walba qarxiyo oo aan la wareego saliidda.”
“Waxaad arki doontaa buundooyin iyo warshado koronto oo ku daadanaya dalkooda oo dhan,” ayuu Trump ku daray, sida laga soo xigtay warbixinta.
Si kastaba ha ahaatee, madaxweynaha Mareykanka wuxuu sheegay in qaar ka mid ah mas’uuliyiinta Iiraan ay “hadda ka wada xaajoonayaan”, wuxuuna sheegay inuu aaminsan yahay inay jirto “fursad wanaagsan” oo heshiis ah oo la gaaro berri oo Isniin ah.
Mas’uuliyiinta Iiraan ayaa beeniyay warka Trump ee ah in Tehran ay raadineyso heshiis.
