Booliska Turkiga ayaa boqolaal qof ku xiray howlgallo ka dhacay dalka oo dhan oo ka dhan ah shabakadaha looga shakisan yahay “Daacish”.
Howlgalkan ayaa daba socday iskahorimaadyo saacado badan qaatay oo ka dhacay waddooyinka oo sababay dhimashada booliiska iyo mintidiinta.
Wasiirka Arrimaha Gudaha Turkiga Ali Yerlikaya ayaa Talaadadii sheegay in booliisku ay xireen 357 tuhmane howlgal qaran oo lagu bartilmaameedsanayo kooxda xagjirka ah ee “Daacish” (ISIS).
Howlgalka ka socda dalka oo dhan ayaa yimid kadib iskahorimaad weyn oo ka dhacay magaalada waqooyi-galbeed ee Yalova, halkaas oo saddex sarkaal oo booliis ah iyo lix looga shakisan yahay inay yihiin mintidiinta lagu dilay iskahorimaad socday siddeed saacadood.
Iskahorimaadka ka dhacay Yalova, oo ku taal xeebta Badda Marmara, wuxuu qayb ka ahaa hawlgal ballaaran oo Isniintii ay ciidamada ammaanku ku bartilmaameedsadeen in ka badan 100 goobood oo dalka oo dhan ah.
Iskahorimaadku wuxuu ku fiday waddooyinka, iyadoo shan dugsi oo ku yaal aagga la xiray, gaaska dabiiciga ah iyo korontadana ayaa la xiray.
Saraakiishu waxay sheegeen in in ka badan 100 qof oo looga shakisan yahay inay ka tirsan yihiin Daacish la xiray toddobaadkii hore sababo la xiriira inay qorsheenayeen inay qaadaan weeraro inta lagu jiro dabaaldegyada Kirismaska iyo Sannadka Cusub.
