Gelitaanka ciidamada Uganda ayaa imaanaya iyadoo ciidamada Congo ay caqabad weyn kala kulmayaan kooxaha fallaagada ah ee doonaya inay maamulaan gobolka qaniga ku ah macdanta.
Ciidamada Uganda ayaa Talaadadii sheegay in ciidamadooda la geyn doono Jamhuuriyadda Dimuqraadiga ah ee Congo (DRC) si ay gacan uga geystaan la dagaalanka maliishiyaadka maxalliga ah.
Ciidamadan ayaa la geyn doonaa magaalada Bunia ee bariga DRC.
Militariga Uganda ayaa ku eedeeyay kooxaha maleeshiyaadku inay “xasuuq” ka geysteen bariga Congo.
Uganda waxa ay hore kumannaan askari uga joogeen DRC ee gobolka Ituri, oo Bunia ay caasimad u tahay.
Ciidamada Uganda ayaa halkaas ku sugnaa iyagoo kaashanaya ciidamada DRC oo ka soo horjeeday koox Islaami ah, Allied Democratic Forces, oo lala xiriiriyay kooxda “Daacish”.
Madaxa ciidamada qalabka sida ee Uganda, Muhoozi Kainerugaba, ayaa kooxaha fallaagada u soo jeediyay amar kama dambeys ah Sabtidii.
“Waxaan siinayaa 24 saacadood dhammaan maleeshiyaadka Bunia inay hubkooda soo dhiibaan. Haddii aysan yeelin waxaan u aqoonsan doonnaa cadow oo aan weeraranayno,” Kainerugaba ayaa soo dhigay bartiisa X.
Sidoo kale Talaadadii, wakaaladda wararka ee Reuters oo soo xiganeysa ilo kala duwan oo milateri iyo diblomaasiyadeed ayaa sheegtay in Burundi ay ciidamadeeda kala baxayso bariga Congo, halkaasoo ay kusoo siqayeen fallaagada M23.
